Հայկական և ռուսական կողմերը կքննարկեն համատեղ հանրակրթական ուսումնական հաստատությունների ստեղծման հայեցակարգը ․ ԿԳՄՍՆ

Արդեն հայտնել էինք, որ Հայաստանում ՌԴ դեսպան Սերգեյ Կոպիրկինը օրերս հանդիպել էր հայտնի ռուս մարդկանց պատվին անվանակոչված երևանյան դպրոցների տնօրեններին։ Նա հայտարարել էր, արդեն իսկ աշխատանքային խումբ է ստեղծվել, որը զբաղվում է ռուսերենով կրթությանն աջակցելու հետ կապված հարցերով։ Factor TV-ն ԿԳՄՍ նախարարությունից հետաքրքրվեց` արդյո՞ք այս թեման նախապես քննարկվել է գերատեսչության հետ, եղե՞լ է հանրային քննարկում:

ԿԳՄՍ նախարարությունից պատասխանել են, որ հիմք ընդունելով Հայաստանի Հանրապետության և Ռուսաստանի Դաշնության միջև տնտեսական համագործակցության միջկառավարական հանձնաժողովի 2022 թվականի դեկտեմբերի 23-ի 21-րդ նիստի արձանագրության 11.2 կետի 5-րդ ենթակետը՝ Հայաստանի Հանրապետությունում համատեղ հանրակրթական ուսումնական հաստատությունների ստեղծման հայեցակարգը քննարկելու և հայ-ռուսական համատեղ համապատասխան աշխատանքների կազմակերպման նպատակով Հայաստանի Հանրապետության կրթության, գիտության, մշակույթի և սպորտի նախարարի 2023 թվականի հունվարի 17-ի հմ. 47-Ա/2 հրամանով ստեղծվել է աշխատանքային խումբ, որն առաջիկայում կանցկացնի առաջին քննարկումը ռուսական կողմի հետ՝ տեսակապի միջոցով. «Միաժամանակ տեղեկացնում ենք, որ «Հանրակրթության մասին» օրենքի 7-րդ հոդվածի 6.1-րդ կետի համաձայն՝ ուսումնական հաստատությունները կարող են միջազգային ծրագրեր իրականացնել և օտար լեզուներով կրթություն կազմակերպել բացառապես Հայաստանի Հանրապետության կառավարության որոշմամբ: Ուսումնական հաստատությանն օտար լեզվով կրթություն կազմակերպելու թույլտվություն տալու կարգը մշակում է կրթության պետական կառավարման լիազորված մարմինը և ներկայացնում Հայաստանի Հանրապետության կառավարության հաստատմանը»,-ասված է նախարարության պատասխանում:

Գերատեսչությունից նաև հայտնում են, որ օտար լեզվով կրթական ծրագրեր կարող են իրականացնել բացառապես ոչ պետական ուսումնական հաստատությունները, ինչպես նաև միջազգային պայմանագրերով ստեղծված ուսումնական հաստատությունները. «Օտար լեզվով կրթական ծրագրեր իրականացնող` սույն մասով սահմանված ուսումնական հաստատություններում սովորող Հայաստանի Հանրապետության քաղաքացիների համար հայոց լեզվի և հայագիտական առարկաների հայերենով ուսուցումը պարտադիր է՝ հանրակրթության պետական չափորոշչին համապատասխան»,-ասված է պատասխանում։

Աննա Բաբաջանյան