24.05.2026 | 01:30
«SOAD-ը Երևանու՞մ». Սերժ Թանկյանը հայտարարել է՝ հուլիսին համերգ չի լինի
20 օր՝ առանց հացի և ջրի. հայկական գամփռ Սիմբայի ողբերգական դեպքը՝ կենդանասերների աչքերով․ ՏԵՍԱՆՅՈՒԹ
Հասարակություն
26.02.2023 | 15:02
Մոտ 1.5 տարեկան Սիմբա անունով հայկական գամփռն օրեր առաջ մահացել է Գայանե Սարգսյանի ձեռքերի մեջ: Ընդամենը 55 կիլոգրամ կշռող շունը մինչև Գայանեի մոտ հայտնվելն արդեն բավականին հյուծված և տկար առողջական վիճակում է եղել. այդ տարիքի հայկական գամփռը պետք է կշռեր նվազագույնը 90 կիլոգրամ։ Գայանեն մինչ օրս Սիմբայի մասին խոսելիս չի կարողանում զսպել արցունքները:
Մինչև Գայանեի մոտ հայտնվելը՝ Սիմբան 10 օր մնացել է Մուշեղ Թումանյանի մոտ: Նրա խոսքով՝ անծանոթ մարդ է իրեն զանգահարել՝ իմանալով, որ կենդանասեր է, և խնդրել է տերերի կողմից 20 օր սնունդ և ջուր չստացած խոշտանգված կենդանուն փրկել:
Մուշեղը պատմում է, որ շանն իրեն հանձնել են «Երազ» մակնիշի ավտոմեքենայով՝ ասելով, թե կենդանին, իբր, շնամարտի է մասնակցել, պարտվել է, ինչի պատճառով տերերը որոշել են այդպես պատժել կենդանուն:
Հյուծված և անուժ վիճակում գտնվող Սիմբային Մուշեղը տարել է կենդանիների համար նախատեսված մի քանի կլինիկա, որտեղ շանը բուժօգնություն են ցուցաբերում, մի քանիսում՝ ներարկումներ, մեկ այլ կլինիկայում՝ ճիճվաթափ անում:
Մուշեղը Սիմբային կրկին տանում է կլինիկա և այդ մասին գրառում անում ֆեյսբուքյան խմբերից մեկում՝ իրեն հայտնի տեղեկությունը ներկայացնելով։ Շան ապաքինման համար դրամահավաք է սկսվում: Արձագանքում է նաև Գայանեն:
Սիմբան, սակայն, չապրեց։ Մոտ 10 տարի շների խնամքով և պաշտպանությամբ զբաղվող Գայանեի վրա կենդանու մահը շատ ծանր հետք է թողել: Ասում է՝ սա հստակ նկարագրում է, թե հաճախ ինչպիսի մարդկանց ձեռքում են հայտնվում կենդանիները:
Ոստիկանության փոխգնդապետ, կենդանասեր Մարթա Մելիքսեթյանին ևս մտահոգել է շան մահվան դեպքը։ Նա շեշտում է՝ Սիմբան շնամարտի չի մասնակցել, սակայն մարդկանց կողմից խոշտանգված միակ կենդանին չէ: Մելիքսեթյանը նշում է՝ նրանք, ովքեր որոշում են ընտանի կենդանիների խնամք ստանձնել, պետք է որոշակի պարտադիր գործընթացներ իրականացնեն:
Մարդու կողմից դաժան վերաբերմունքը դրսևորվում է ոչ միայն շների, կատուների, այլև այլ կենդանիների նկատմամբ: Դեռևս 2019 թվականին «Բարգավաճ Հայաստան» խմբակցության մի քանի պատգամավորներ, որոնց թվում էր նաև Նաիրա Զոհրաբյանը, առաջարկում էին քրեականացնել կենդանիների նկատմամբ դաժան վերաբերմունքը։
Նախագիծն ընդունվեց 99 կողմ, 4 դեմ ձայներով, ըստ որի՝ նախատեսվեց, որ կենդանիների նկատմամբ դաժան վերաբերմունքը կպատժվի տուգանքով՝ 100-500 հազար դրամի չափով, կամ կալանքով՝ 1-3 ամիս ժամկետով, կամ ազատազրկմամբ՝ առավելագույնը 3 տարի ժամկետով: Օրենքի ընդունումից հետո, սակայն, դեռևս որևէ անձի մասով դատական ակտ ուժի մեջ չի մտել:
Մանրամասները՝ տեսանյութում։
Ռոզա Վարդանյան
