10.08.2026 | 16:09
Երբ պատգամավորն ասում է՝ ուզում եմ հայ զինվորը մեռնի, քննարկելի՞ է էթիկայի հանձնաժողովում․ Ռուբինյան. ՏԵՍԱՆՅՈՒԹ
Լրագրողներն ավելի քան 88 հազար ռուս զինվորների անուններ են պարզել, որոնք զոհվել են Ուկրաինայի դեմ պատերազմում
Քաղաքականություն
10.01.2025 | 21:29
Ռուսաստանի կողմից Ուկրաինա լայնամասշտաբ ներխուժման սկզբից ի վեր առաջնագծում զոհվել է 88,055 ռուս զինծառայողներ։ Նրանց ինքնությունը պարզվել է BBC-ի ռուսական ծառայության, Mediazona-ի և կամավորների խմբի կողմից՝ բաց աղբյուրներից ստացված տվյալների հիման վրա (ներառյալ մահացածի հարազատների պաշտոնական հաղորդումներն ու հրապարակումները սոցիալական ցանցերում), գրում է Current time-ը։
Նրանց թվում են 6083 կադրային զինծառայողներ Օդադեսանտային ուժերի առավել մարտունակ ստորաբաժանումներից, ծովային հետևակայիններից, պաշտպանության նախարարության և Ռուսաստանի ազգային գվարդիայի հատուկ նշանակության ստորաբաժանումներից, ինչպես նաև ռազմական օդաչուներ: Լրագրողները նշում են, որ նման մասնագետներ պատրաստելու համար տարիներ ջանք ու միլիոնավոր դոլարներ են ծախսվել։
Դեսանտայինները, ծովայինները և հատուկ ջոկատայինները ամենամեծ կորուստներն են կրել լայնածավալ ներխուժման առաջին ամիսներին, ավելի ուշ ռազմաճակատում սկսել են օգտագործել բանտարկյալներից,ժամկետային զինծառայողներից և կամավորներից կազմված ստորաբաժանումները։
2024 թվականի սեպտեմբերին կամավորների կորուստները գերազանցել են պատերազմի մասնակիցների այլ կատեգորիաների, այդ թվում՝ բանտարկյալների և մոբիլիզացված զինվորների կորուստները։
Լրագրողներին հաջողվել է հաստատել 3240 կադրային դեսանտայինների մահը, այդ թվում՝ 654 սպաների։Բացի այդ՝ Ուկրաինայի դեմ պատերազմում զոհվել է 1247 ծովային հետևակ (214 սպա) եւ 580 հատուկ ջոկատային (108 սպա)։
Լայնածավալ պատերազմի ընթացքում զոհվել են նաև 267 ռուս ռազմական օդաչուներ։ Լրագրողները նշում են, որ դրանք հազվագյուտ մասնագետներ են, և նրանց պատրաստելու համար տարիներ են պահանջվում։
Թարգմանությունը՝ Էմմա Չոբանյանի
