ԹԵԺ ԲԱՆԱՎԵՃ․ Ալիևի սպառնալիքն ու Փաշինյանի պատասխանը, ի՞նչ սպասել ԵՄ-ին անդամակցելու որոշումից հետո. ՏԵՍԱՆՅՈՒԹ

2025 թվականը սկսվեց Իլհամ Ալիևի՝ Հայաստանի դեմ մեղադրանքներով և սպառնալիքներով։ Ադրբեջանի նախագահը Հայաստանի Հանրապետությունը ֆաշիստական պետություն որակելով՝  ՀՀ իշխանություններից պահանջեց կամ վերացնել իր բնորոշմամբ «ֆաշիզմը», կամ սպառնաց, որ դա ինքը կանի։ Ալիևը թարմացրեց նաև Հայաստանի տարածքով դեպի Թուրքիա միջանցք ստանալու պահանջը՝ պնդելով, թե միևնույնն է՝ բացվելու է այդ միջանցքը։ Նիկոլ Փաշինյանի պատասխանը Ալիևին չուներ նույն ագրեսիվ տոնը։ Հայաստանի վարչապետն ընդգծեց, որ «Բաքուն փորձում է տարածաշրջանում էսկալացիայի «լեգիտիմություն» ձևավորել, սակայն Երևանը չի գնալու այդ ճանապարհով, հավատարիմ է մնալու խաղաղության ռազմավարությանը և հետևողականորեն շարունակելու է խաղաղության օրակարգի իրագործումը։ Վարչապետն ասաց, որ խաղաղության պայմանագրի 17 կետերից 15-ը համաձայնեցված է, և եթե Հայաստանի ուղարկած 2 առաջարկը ևս Ադրբեջանն ընդունի, պայմանագիրը կստորագրվի Երևանի կողմից։

Օրեր անց ՀՀ կառավարությունը հավանություն տվեց ԵՄ-ին անդամակցելու գործընթացի մեկնարկի մասին Եվրաքվեի օրենքի նախագծին։ Եվ եթե ՀՀ ԱԺ-ն կողմ քվեարկի նախագծին, ՀՀ-ն պաշտոնապես կսկսի ԵՄ-ին անդամակցելու պրոցես։ Ի՞նչ սպասել Ադրբեջանի նախագահի սպառնալիքներից․ դա պատերազմի՞ անոնս է, թե՞ պարզունակ շանտաժ՝ ՀՀ-ից զիջումներ կորզելու։ Եվ ի՞նչ կապ ունի ԵՄ-ին անդամակցելու թեման։

Factor TV-ում հրավիրված բանավեճին մասնակցում են քաղաքական վերլուծաբան Արմեն Հովհաննիսյանը, քաղաքագետ Հարություն Մկրտչյանը, «Հանրապետություն» կուսակցության անդամ Անահիտ Ադամյանը, ԼՀԿ փոխնախագահ Դավիթ Խաժակյանը, ԱԺԲ անդամ Գևորգ Սաֆարյանը, «Դեմոկրատական այլընտրանք» կուսակցության ղեկավար Սուրեն Սուրենյանցը։