24.08.2026 | 23:26
Ծանրորդ Տիգրան Ավետիսյանը՝ Եվրոպայի Մ15 տարեկանների չեմպիոն
Դեղերը վաճառում են օրենք խախտելով․ Factor TV-ի շրջայցը դեղատներում. ՏԵՍԱՆՅՈՒԹ
Հասարակություն
10.01.2025 | 21:15
Factor TV-ն Երևանի կենտրոնում գտնվող հինգ դեղատներից չորսում կարողացավ դեղորայք գնել առանց դեղատոմսի, այնինչ 2024 թվականի մարտից մի շարք դեղեր պետք է վաճառվեին միայն էլեկտրոնային դեղատոմսով։ Առանց դեղատոմսի վաճառքի արգելք կա 470 անուն դեղի համար, այդ թվում՝ հակավարակային, հակաբիոտիկային, հակասնկային, հակամիկրոբակտերային, հակավիրուսային, իմունային շիճուկների, իմունոգլոբիլինի, պատվաստանյութերի ու միզոպռոֆոլ պարունակող դեղամիջոցների։ Factor TV-ն արգելքի ուժի մեջ մտնելու առաջին օրերին ևս շրջայց էր կատարել դեղատներով և խախտումներ արձանագրել։
Ստացվում է՝ 10 ամսվա ընթացքում պատկերը գրեթե չի փոխվել։ Արդյո՞ք տեսչական մարմինն արձանագրում է այդ խախտումները։ Թե վերահսկող մարմինը տարվա ընթացքում քանի ստուգում պետք է իրականացնի, որոշվում է՝ ըստ ռիսկայնության և եղած ռեսուրսների, իսկ որոշել ու վերահսկել տեսչական մարմինն իրավունք չունի, ամփոփիչ ասուլիսի ժամանակ ասաց Առողջապահական և աշխատանքի տեսչական մարմնի ղեկավար Սլավիկ Սարգսյանը։
Նրա խոսքով՝ անկախ նրանից, թե տնտեսվարող սուբյեկտը երբ է ընդգրկվում տեսչական մարմնի ստուգումների ցանկում, դիտարկվում է չստուգված ամբողջ ժամանակահատվածը։ Խնդրի շուրջ երկու օր առաջ քննարկում է եղել նաև Ազգային ժողովում։
Դեղատների ներկայացուցիչները պնդում են՝ իրենք չեն ուզում խախտել օրենքը, բայց բժիշկները դուրս չեն գրում բավարար քանակությամբ դեղատոմսեր, իսկ իրենք բուժառուներին չսպասարկել չեն կարող։
Շուրջ 600 դեղատուն տարեվերջին նամակով դիմել էր վարչապետ Նիկոլ Փաշինյանին՝ խնդրելով հանձնարարել իրավասու մարմիններին դադարեցնել էլեկտրոնային դեղատոմսերի հետ կապված դեղատնային գործունեություն իրականացնող ընկերությունների նկատմամբ, իրենց գնահատմամբ, ոչ իրավաչափ և անհամաչափ տուգանքներ կիրառելու գործելակերպը։ Նամակում նրանք նշել էին, որ եթե նախկինում տեսչական մարմինը 5000 դրամ տուգանք էր կիրառում յուրաքանչյուր անվանում դեղի համար, ապա այժմ 5000 դրամ տուգանքը կիրառվում է իրացված յուրաքանչյուր հատ դեղի համար։
Այսօր տեսչական մարմնի ղեկավարն այս թեմայով Factor TV-ի հարցին ի պատասխան՝ նշեց, որ յուրաքանչյուր հատիկ դեղի համար տեսչական մարմինը երբեք չի տուգանում։
2024 թվականի ընթացքում առանց էլեկտրոնային դեղատոմսի դեղորայքի դուրսգրման համար մոտ 200 մլն դրամի տույժ է կիրառվել։ Կառավարությունը նախատեսում էր 2025 թվականի հունվարի 1-ից ընդլայնել էլեկտրոնային դեղատոմսերով բաց թողնվող դեղերի ցանկը, սակայն որոշումը հետաձգվել է մինչև այս տարվա հուլիսի 1-ը:
Մանրամասները՝ տեսանյութում։
Անի Թամրազյան
