Որոտնավանի «տաք ջուրը», որը սեփականաշնորհել էր Հերմինե Նաղդալյանը, մնացել է անտեր․ ԼՈՒՍԱՆԿԱՐՆԵՐ

Սյունիքի մարզի Սիսիանի շրջանի Որոտնավան գյուղում հողի ընդերքից հանքային աղերով հարուստ ջուր է դուրս գալիս, որը տեղացիներն անվանում են «տաք ջուր»: Ջուրն իսկապես տաք է, առողջարար և հանքանյութերով լի, ինչի շնորհիվ էլ տասնյակ տարիներ Հայաստանի տարբեր հատվածներից և այլ երկրներից զբոսաշրջիկներ են այցելում Որոտնավան՝ «տաք ջրում» լողալու։

Մի քանի տարի է, ինչ Որոտնավանի այս բնական հարստությունը կայուն տեմպերով վերածվում է ճահճի՝ անընդհատ աղտոտվելու և չմաքրվելու հետևանքով:

2006 թվականի ապրիլին հանքային ջրի աղբյուրը սեփականաշնորհել է այդ ժամանակ ԱԺ ՀՀԿ-ական պատգամավոր Հերմինե Նաղդալյանին փոխկապակցված «Նազենիկ» ՍՊԸ-ի կողմից:

Կադաստրի կոմիտեում առկա սեփականաշնորհման տեղեկանքում հողամասը բնակավայրերի և հասարակական կառուցապատման նշանակություն ունի։ Տեղեկանքում որևէ նշում չկա այն մասին, որ այդ հողամասում բնական հանքային ջրի ակունք կա։

Իհարկե, այն ժամանակ իշխանական պատգամավորը փորձել է հեռատես գտնվել և զբոսաշրջիկներին գրավող հանքային ակունքի շնորհիվ՝ զարգացնել հերթական բիզնեսը։ Սակայն, անհայտ հանգամանքներից ելնելով, նախկին պագամավորի ծրագրերը չեն իրականացել։

«Նազենիկ» ՍՊԸ-ի ներկայիս 60 տոկոս բաժնետերը Նաղդալյանի ամուսնու մայրն է։ Ինքը՝ նախկին պատգամավորը, ընկերության իր 20 տոկոս բաժնեմասից հրաժարվել է 2012 թվականին։

Ինչպես Հայաստանում իշխանական լծակների գործադրմամբ տարբեր ժամանակներում սեփականաշնորհված և լքված մյուս տարածքները, այնպես էլ Որոտնավանի հարստությունը կրող այս հողատարածքը վերածվում է աղբանոցի։ Ամեն տարի գյուղ այցելող զբոսաշրջիկների թիվը նվազում է գարշահոտի, կեղտի և տիղմի պատճառով:

Տարածքը կարող է մաքրվել, բարեկարգվել և օգտագործվել որպես առողջարան, ինչն էլ կխթանի զբոսաշրջությանը և համայնքի զարգացմանը: Կայացած զբոսաշրջություն ունենալու պարագայում՝ գյուղում կբացվեն խանութներ, հյուրատներ և սրճարաններ, գյուղացին հնարավորություն կունենա իրացնել գյուղմթերքը:

Այս ամենը, սակայն, իրականություն չի դառնում արդեն 16 տարի, քանի որ ողջ համայնքի բարեկեցությունը կախված է նախկին պաշտոնյա սեփականատիրոջ կամքից։

Մի խումբ որոտնավանցիներ