«Ասում ա՝ էդքան փող կյանքումդ ե՞ս տեսել»․ Ֆիրդուսի բնակիչները դժգոհ են օտարման գործընթացից․ ՏԵՍԱՆՅՈՒԹ

Երևանի Ֆիրդուսի 50 հասցեի բնակիչ Վազգեն Փխրիկյանն արդեն 20 տարի է՝ սպասում է իր սեփականություն հանդիսացող հողի իրացմանը։ 2000-ականներին այս տարածքը ճանաչվել է հանրային գերակա շահ, մի քանի անգամ հատկացվել է տարբեր ընկերությունների, բայց այդպես էլ չի իրացվել։

Կառավարության վերջին որոշումը 2018 թվականին է կայացվել, տարածքը ձեռք բերողներ են ճանաչվել 17 կազմակերպություններ: Նրանց կողմից իրականացվել է օտարման գործընթաց՝ օտարման ենթակա տարածքի մեծ մասի նկատմամբ:

Վազգեն Փխրիկյանին պատկանող մոտ 2000 քմ մակերեսով տարածքը դեռ շարունակում է մնալ չիրացված։ Ասում է՝ վերջին 20 տարվա ընթացքում առաջին անգամ նախորդ տարի են իրենց կոնկրետ գումար առաջարկել՝ 1200 դոլար՝ մեկ քմ-ի դիմաց, և իրենք համաձայն չեն։

Տարածքում հիմա մի քանի ընտանիք է ապրում։ 2 քույրերն ու եղբայրը բնակվում են ընտանիքի 12 անդամների հետ։ Այգում էլ հաճախ զբոսաշրջիկների համար անվճար հյուրասիրություն են կազմակերպում։

Արդեն շուրջ մեկ դար Փխրիկյաններին պատկանող հողը փոխանցվել է «Կարս Քոնսթրաքշն» և «Բաբերդ Քոնսթրաքշն» ընկերություններին՝ բազմաֆունկցիանալ շենքեր կառուցելու նպատակով, տարածքի մոտ 40 %-ն էլ պետք է զբաղեցնի ներթաղային ճանապարհը։ Իրացման ժամկետը լրանում է մինչև տարեվերջ, սակայն համաձայնություն դեռևս ձեռք չի բերվել։ Տարածքը ձեռք բերած ընկերությունների հետ կապ հաստատել չհաջողվեց, իսկ Երևանի քաղաքապետարանից մեր հարցմանն ի պատասխան նշեցին, որ սեփականությունը կարող է օտարվել` ձեռք բերողի և օտարման ենթակա սեփականության տիրոջ միջև կնքվող պայմանագրի համաձայն: Այս դեպքում կողմերի համաձայնությամբ են միայն որոշվում օտարվող սեփականության դիմաց տրվող համարժեք փոխհատուցման չափը, ձևը, կարգը, ժամկետները, պայմաններն ու կողմերի պատասխանատվությունը: Անհամաձայնության դեպքում օտարված անշարժ գույքի սեփականատերը կարող է դիմել ցանկացած փորձագիտական կենտրոն՝ անշարժ գույքի վերաբերյալ համապատասխան փորձաքննություն իրականացնելու համար:

Եթե օտարման պայմանագրի նախագիծը սեփականատիրոջն ուղարկելուց հետո երեք ամսվա ընթացքում օտարման պայմանագիր չի կնքվում, ապա ձեռք բերողը պարտավոր է մեկ ամսվա ընթացքում սեփականության օտարման դիմաց փոխհատուցման ենթակա գումարը հանձնել դատարանի կամ նոտարի դեպոզիտ հաշիվ՝ այդ մասին եռօրյա ժամկետում տեղեկացնելով օտարվող սեփականության սեփականատիրոջը: Եթե յոթ օրվա ընթացքում կրկին չի կնքվում պայմանագիրը կամ սեփականությունը չի օտարվում, ապա ձեռք բերողը պարտավոր է մեկամսյա ժամկետում սեփականության օտարման հայցով դիմել դատարան: Այս դեպքում դատարանի քննարկման առարկա կարող է լինել միայն փոխհատուցման չափի հարցը։ Դատարան արդեն հայց ներկայացվել է, սակայն դատական նիստ դեռ չի նշանակվել։ Գործի հետագա ընթացքը կլուծվի դատարանի կողմից օրինական ուժի մեջ մտած վճռի համաձայն:

Մանրամասները՝ տեսանյութում։

Սաթենիկ Հայրապետյան