Խաղաղությունը չի կարող լինել ուղղակի տարածքների անվտանգությամբ, դա մարդկանց անվտանգության հարց է. ՄԻՊ․ ՏԵՍԱՆՅՈՒԹ

Քաղաքական որոշումները, այս կամ այն կարգավիճակի վերաբերյալ քննարկումներն ու լուծումները պետք է բխեն մարդու իրավունքների երաշխավորումից: Այս մասին այսօր ԱԺ-ում լրագրողների հետ զրույցում նշեց ՄԻՊ Քրիստինե Գրիգորյանը՝ ընդգծելով, որ այս պահին խախտված են արցախցիների մի շարք իրավունքներ:

Անդրադառնալով դիտարկմանը, որ Փաշինյանի խոսքով՝ այլևս ինքնորոշման իրավունքը նպատակ չէ, այլ միջոց, և որ անվտանգության երաշխիքներն են դարձել ԼՂ հարցով բանակցային գործընթացի առանցքը՝ Գրիգորյանը նշեց. «Որպես ՄԻՊ դժվար է դատողություններ անել, որովհետև բավարար տեղեկություն չունեմ, թե արդյոք անվտանգության երաշխիքների համար ինչ խնդիրներ կան, որոնք առաջին հերթին պետք է քաղաքական լուծում ստանան, սա իշխանությունների գործն է:

ՄԻՊ-ի խնդիրն է հավաքագրված փաստերը ներկայացնել կառավարությանը և մարդու իրավունքներով զբաղվող միջազգային կազմակերպություններին, նաև համանախագահության երկրների դեսպանատներին՝ ցույց տալու համար, որ ատելության քաղաքականությունը ուղղակիորեն միտված է հայաթափմանը: Կարծում եմ՝ քաղաքական ուժերը կարող են օգտվել այս փաստերից՝ առաջ մղելու քաղաքական կոնկրետ որոշումներ, որոնք պետք է սպասարկեն մարդկանց իրավունքները»:

ՄԻՊ-ն ընդգծեց, որ երբ խոսվում է անվտանգության, խաղաղության մասին, դա չի կարող լինել ուղղակի տարածքների խաղաղության կամ անվտանգության մասին. «Դա մարդկանց անվտանգության հարցն է, և իրավունքները պետք է դրվեն բոլոր որոշումների հիմքում»:

Մանրամասները՝ տեսանյութում: