Առավոտից ուշ գիշեր սպասում ենք, պատասխան չկա․ հնդիկ ուսանողները մնացել են առանց կրթության ու դիպլոմի. ՏԵՍԱՆՅՈՒԹ

Սուրբ Թերեզայի անվան բժշկական համալսարանի շուրջ կոռուպցիոն սկանդալից ու համալսարանի լիցենզիան դադարեցնելուց հետո շուրջ 120 հնդիկ ուսանողներ կանգնել են խնդրի առաջ․ ուսանողներին առաջարկվում է կրթությունը շարունակել այլ բուհերում, բայց անհրաժեշտ փաստաթղթերը համալսարանից չեն կարողանում ստանալ։

«Առավոտյան ժամը 5-ից մինչև ուշ գիշեր հավաքվում ենք այստեղ, սպասում, բայց պատասխան չենք ստանում։ 20 օր է՝ նույնն է։ Անվտանգության աշխատակիցը թույլ չի տալիս ներս մտնել, ոչ ոք չի կարողանում ներս մտնել, բոլորս դրսում սպասում ենք»,- Factor TV-ի հետ զրույցում նշում է ուսանողներից մեկը։

Բուհի բակալավրի և մագիստրոսի ծրագրով լիցենզիաների գործողությունը դադարեցվել էր ԿԳՄՍ նախարարի փետրվարի 18-ի հրամանով։ Պատճառը հայտնաբերված մի շարք խախտումներն են՝ պրոֆեսորադասախոսական կազմի, ուսումնական տարածքի, ուսումնամեթոդական ապահովության, ուսումնական պրակտիկայի ներկայացված պահանջներին անհամապատասխանությունը, ինչպես նաև սահմանված թվից ավելի ուսանողների ընդունումը։

Ուտկաշ Արյան 6-րդ կուրսի ուսանող է, ընդհանուր վիրաբուժություն է սովորում․ այս տարի պետք է ավարտեր համալսարանն ու հայրենիք վերադառնար։

«Իմ ծնողները Հնդկաստանում ինձ են սպասում, մտածում են՝ այս տարի իրենց որդին կավարտի ու դիպլոմը ձեռքին տուն կգա։ Ես զանգեմ, ի՞նչ ասեմ նրանց, համալսարանը փակվե՞լ է»,- ասում է Ուտկաշ Արյան։

Նախարարությունն ուսանողներին առաջարկում է կրթությունը շարունակել Հայաստանում գործող այլ բուհերում․ դրանց ցանկը հրապարակվել է նախարարության կայքում, սակայն ուսանողները նշում են՝ 1-2 տարի են կորցնում։

«Ասում են՝ որպես վերջին կուրսի ուսանող չենք կարող ընդունել։ Հայբուսակը, Հերացու համալսարանը։ Ասում են՝ եթե ընդունենք, պետք է 1 կամ 2 տարի ցածր կուրսից սկսել։ Օրինակ ես 6-րդ կուրսում եմ սովորում, պետք է 5-րդ կամ 4-րդ կուրս ընդունվեմ և նորից վճարեմ։ Ես արդեն այստեղ վճարել եմ 1500 դոլար»։

Անդրադառնալով նախարարության հայտնաբերած խախտումներին՝ Ուտկաշը նշում է՝ ինքը ևս դժգոհ է իր ստացած կրթության որակից։

«Այս համալսարանը որակ չունի, աշխատակազմ չկա, ովքեր կարող են զբաղվել ուսանողների հետ, միայն մի դասասենյակ ու մի համակարգիչ ունենք, ուրիշ ոչինչ չունենք։ Մենք ոչինչ չգիտենք, չենք կարող որոշել, օրինակ՝ այս մարդը ջերմություն ունի, ինչ առողջական խնդիր է, ոչինչ չգիտենք։ Եթե դասախոսը չի սովորեցրել, որտեղի՞ց իմանանք»,- ասում է ուսանողը։

Factor TV-ն փորձեց պարզաբանում ստանալ նաև համալսարանի ռեկտորից, սակայն նա համալսարանում չէր։ Մեզ դիմավորեց պրոռեկտորը, որը հրաժարվեց տեսախցիկի առաջ խոսել։ Այնուամենայնիվ, մեզ հետ զրույցում նշեց՝ ուսանողների ակադեմիական տեղեկագրերը գտնվում են ռեկտորի սենյակում, դուռը փակ է, իսկ ռեկտորի գտնվելու վայրի մասին տեղեկություններ չունեն, վաղուց է՝ ինչ չի եկել աշխատանքի։ ԿԳՄՍ նախարարությունից էլ մեզ փոխանցեցին, որ խնդիրն իրենց դաշտում չէ։

Մանրամասները՝ տեսանյութում։

Անժելա Պողոսյան