«Քնած» քրեական գործեր, ՄԱՍ 1-ին․ ԱՐԱՄ ՀԱՐՈՒԹՅՈՒՆՅԱՆ

Արդարադատություն, կոռուպցիայի դեմ անզիջում պայքար, պետությունից թալանված գումարների վերադարձ․․․ Թավշյա հեղափոխությունն իրականություն դարձավ հեղափոխական առաջնորդի՝ հիմնականում այս կարգախոսների ֆոնին։ Եվ , իսկապես, իշխանափոխությունից անմիջապես հետո իրավապահ մարմինները սկսեցին ուսումնասիրել վարչապետ Նիկոլ Փաշինյանի կողմից պարբերաբար բարձրաձայնվող ապօրինիությունները և քրեական գործեր հարուցել նախկին իշխանությունների հայտնի ներկայացուցիչների նկատմամբ։ Բայց այդ աղմկահարույց գործերից շատերն այդպես էլ մնացին նախաքննության փուլում, իսկ բարձրաստիճան մեղադրյալներն՝ ազատության մեջ։ Factor TV-ին սկսում է շարք, որտեղ կներկայացնի ամենաաղմկահարույց քրեական գործերի ընթացքը։ 

Այս կամ այն նախկին պաշտոնյան առաջիկայում խոշոր քրեական գործով է անցնելու․  վարչապետ դառնալուց հետո Նիկոլ Փաշինյանը հաճախ էր այս մասին խոսում ֆեյսբուքյան ուղիղ եթերում կամ հրապարակային այլ ելույթներում։ Չնայած դրան՝ նորանշանակ վարչապետը հիմնականում խուսափում էր հստակ անուններ նշել, ինչն  ավելի էր մեծացնում հանրության հետաքրքրությունը թեմայի նկատմամբ։Ելույթներից ամենաաղմկահարույցը, թերևս, 2018 թվականի հոկտեմբերի 24-ին էր, երբ վարչապետ Նիկոլ Փաշինյանն Ազգային ժողովի ամբիոնից հայտարարեց, որ ԱԺ նախկին պատգամավորներից մեկի նկատմամբ կա քրեական գործ, որն արդեն 100 տոկոսով ապացուցված է․

«Դա լինելու է 3-րդ Հանրապետության ամենախոշոր կաշառքի գործը»,- իր ելույթում նշել էր վարչապետը։Թեև այս անգամ էլ Փաշինյանը որևէ անուն չնշեց, սակայն շատերի համար ակնհայտ  էր, որ խոսքը Արամ Հարությունյանի մասին է։ Զանազան բարձրաստիճան պաշտոններ զբաղեցրած Հարությունյանը հանրության ուշադրության կենտրոնում հայտնվեց 2015 թվականին, երբ նրա անունը սկսեց շրջանառվել առանձնակի խոշոր չափերի կաշառք տալու քրեական գործով։ ՀՀԿ անդամը սակայն պատասխանատվության չենթարկվեց․ կարճ ժամանակ անց՝ գործի վարույթը կարճվեց՝ հանցակազմի բացակայության հիմքով։ Հենց այս քրեական գործի մասին էր հայտնի ելույթում բարձրաձայնում Փաշինյանը։ Եվ մինչ իրավապահները փնտրում էին մեղավորին, գործարար Սիլվա Համբարձումյանը հայտարարեց, որ 2008 թվականին ինքն է այդ ժամանակվա բնապահպանության նախարար Արամ Հարությունյանին 14 մլն դոլար կաշառք տվել, որ կարողանա 10 հանքավայրերում ուսումնասիրություններ կատարելու լիցենզիա ստանալ, իսկ մեկ տարի անց՝ թուլտվություն ունենա 25 տարի ժամկետով այդ հանքերը շահագործելու վերաբերյալ: Հարությունյանին առաջադրվեց մեղադրանք՝ առանձնապես խոշոր չափերով կաշառք ստանալու համար՝ Քրեական օրենսգրքի 311-րդ հոդվածի 4-րդ մասի 2-րդ կետով և հանցավոր ճանապարհով ստացված եկամուտների օրինականացման համար՝ 190-րդ հոդվածի 3-րդ մասի 1-ին կետով: 

ՀՀ գլխավոր դատախազ Արթուր Դավթյանը միջնորդություններ ներկայացրեց ՀՀ Ազգային ժողովին` պատգամավորի նկատմամբ քրեական հետապնդում հարուցելու և նրան կալանավորելու համաձայնություն ստանալու համար։ Պատգամավորին անձեռնամխելիությունից զրկել հաջողվեց միայն երկրորդ փորձից, ինչից հետո դատարանը կալանավորման որոշում կայացրեց։ Կալանքի որոշումը, սակայն, այդպես էլ իրագործել չհաջողվեց։ Արամ Հարությունյանն իրավապահների տեսադաշտից պարզապես անհետացավ․ ըստ շրջանառվող տեղեկությունների՝ վերջինս լքել էր Հայաստանը մեղադրանքի հաստատումից մի քանի օր առաջ։

Մանրամասները՝ տեսանյութում։ 

Ռոզա Վարդանյան