24.04.2024 | 00:41
Մտահոգված ենք Հայաստանում ոստիկանական բռնության մասին հաղորդումների աճով. Freedom House
Վերին Շորժայի սարերում ադրբեջանական ԶՈՒ-ն դիրքից դիրք անարգել անցնելու համար տեխնիկա է կիրառում․ համայնքապետ
Քաղաքականություն
04.06.2021 | 16:06
Գեղարքունիքի մարզի սահմանամերձ համայնքներում իրավիճակը շարունակում է լարված մնալ։ Վերին Շորժա համայնքի սարերում ադրբեջանական շարժ է նկատվել․ նրանք սկսել են տեխնիկա կիրառել, որպեսզի դիրքից դիրք կարողանան անարգել անցնել։ Այս մասին Factor.am-ի հետ զրույցում ասաց Վերին Շորժայի համայնքապետ Արտյոմ Երանոսյանը։
«Այն դիրքերը, որտեղ հիմա ադրբեջանցիներն են, նախկինում արոտավայրեր են եղել։ Սարի լանջին աշխատող տեխնիկա է երևում, որոնք, իմ կարծիքով, ադրբեջանական ԶՈՒ-ի շարժը ավելի հեշտ կազմակերպելու համար են»,- նշեց համայնքապետը։
Նշենք, որ ՀՀ ՄԻՊ-ն արձանագրել է՝ «ադրբեջանական զինվորականները պարբերաբար մի քանիսից մինչև մի քանի տասնյակի հասնող անձնակազմերով զինված, այդ թվում՝ մեքենաներով, իջնում են դեպի Վարդենիս համայնքի Վերին Շորժա գյուղի արոտավայրերը, որտեղ գտնվում են անասնագոմերը և որտեղ գյուղացիներն արածեցնում են իրենց կենդանիներին: Նրանք դրսևորում են ցինիկ պահվածք, սպառնալիքներ տալիս գյուղացիներին զենքի ցուցադրումով: Նրանք վերջին շաբաթվա ընթացքում դիրքեր են տեղակայել Վերին Շորժայի սարատեղին առավել մոտ վայրերում և դրանով գրեթե անհնարին դարձրել արոտավայրերն օգտագործելը»։
Վերին Շորժայի համայնքապետը նշեց՝ ադրբեջանական ԶՈՒ-ն որևէ իրավունք չունի այդ հատվածում ճանապարհ բացելու՝ սարի լանջով մեքենաներով տեղաշարժվելու համար։
Նշենք, որ խնդրի շուրջ ՀՀ Պաշտպանությունից նախարարությունից մեկնաբանություն ստանալ չհաջողվեց․ մեր հեռախոսազանգերին չպատասխանեցին։ Մեկնաբանությունը կներկայացնենք ստանալուն պես։
Հիշեցնենք՝ Ադրբեջանի ԶՈՒ զինծառայողները մայիսի 12-ից ներխուժել են Հայաստանի Հանրապետության ինքնիշխան տարածք և փորձում են ամրապնդվել այնտեղ։
Արփի Հակոբյան
