Ինչի՞ց էին պաշտպանում քաղաքապետին, եթե ապակե տարաների պարունակությունն արդեն գետնին էր. Երվանդ Վարոսյան

Մամուլը և սոցցանցերը ողողված են Երևանի ավագանու նիստի ամենաթեժ պահերի տեսագրություններով, խմբակային ծեծի պատկերներով, իրավապաշտպանները կատարվածը միաձայն որակում են որպես բռնություն «Երկիր Ծիրանի» խմբակցության անդամ Մարինա Խաչատրյանի նկատմամբ: Իսկ խմբակցության ղեկավար Զարուհի Փոստանջյանը հայտարարություն է տարածել՝ պահանջելով քրեական գործ հարուցել իր կուսակիցների վրա հարձակվողների, նրանց հասցեին սպառնալիքներ հնչեցնողների դեմ:

Դատախազությունը սակայն չի շտապում երեկվա «հերոսամարտի» հետ կապված քայլեր կատարել, կամ գոնե ձևական հայտարարությամբ հանդես գալ կատարվածի շուրջ, ինչպես վարվում է, օրինակ, ընտրությունների օրերին: Մինչդեռ այն պարտավոր էր քրեական գործ հարուցել: Այս կարծիքը հայտնեց փաստաբան Երվանդ Վարոսյանը՝ պատասխանելով Factor.am -ի հարցերին:

– Ինչպե՞ս պետք է վարվի դատախազությունը, երբ այսքան տեսանյութեր կան երեկվա նիստի դրվագներով: Գուցե, էմոցիոնալ են հանրության ընկալումները, և իրականում հանցակազմ չկա՞:

– Տեսանյութում ակնհայտ բռնության կիրառման փաստեր կան։ Ընդ որում կան ուղիղ հարվածներ, մազերից քաշել և այլն, որը չի կարող պատճառաբանվել ինչ-որ ենթադրյալ գործողություն կանխելով։ Հիմնական բռնությունը գործադրվել է այն բանից հետո, երբ ապակե տարաների պարունակությունն արդեն գետնին էր, ուստի քիմիական զենքի կիրառումից քաղաքապետին պաշտպանելու, կամ որևէ այլ անձի անվտանգությունն ապահովելու մասին պատճառաբանություններն ու կիրառված բռնությունը կապ չեն կարող ունենալ: Ակնհայտ է, որ տեղի ունեցած փաստի առթիվ պետք է հարուցվի քրեական գործ, նշանակվեն դատաբժշկական փորձաքննություններ, ապա իրավական գնահատական տրվի բռնություն գործադրողների գործողություններին։

– Տեսագրություններում երևում է, որ Մարինա Խաչատրյանը ապտակում է ավագանու անդամ, ՀՀԿ-ական Էդմոնդ Կիրակոսյանին: Ոմանք կարծիք են հայտնում, որ այդ դեպքում նրա գործողություններին էլ պետք է իրավական գնահատական տրվի:

– Քրեական իրավունքը նախատեսում է «անհրաժեշտ պաշտպանություն» հասկացությունը, սակայն չի նախատեսում պատասխան հարված հասկացություն։ Բացի այդ բռնություն գործադրվում է տարբեր անձանց կողմից և տարբեր կողմերից։

– Ստացվում է «խմբակային» ծեծ:

– Այդպիսի հոդված չկա: Ծեծը ծեծ է: Բայց եթե մի շուկայում հասարակ մարդիկ նման բան արած լինեին, հիմա «խմբով խուլիգանություն» հոդվածով հարուցել էին:

Սյուզան Սիմոնյան