Այդ պայմանագրին նաև հակասում է, որ իրենք մեր թշնամիներին զենք են վաճառում. քաղաքագետների արձագանքը՝ Մոդեստ Կոլերովի հայտարարությանը

«Դա եղել է Ռուսաստանի կողմից ամենալկտի շանտաժն ուղղված Հայաստանին»,- Factor.am-ի հետ զրույցում հայտարարեց քաղաքագետ Ռուբեն Մեհրաբյանը՝ անդրադառնալով Վրաստանում ընթացող ՆԱՏՕ-ի զորավարժություններին Հայաստանի չմասնակցելու փաստին:

Հիշեցնենք՝ երեկ մեկնարկած զորավարժությունները շարունակվելու են մինչև սեպտեմբերի 11-ը, դրանց մասնակցում են ԱՄՆ ծովային հետևակի, ինչպես նաև Վրաստանի, Ադրբեջանի, Բուլղարիայի, Ռումինիայի, Լատվիայի և Ուկրաինայի բանակային ստորաբաժանումները: Մինչ պաշտոնական Երևանից պնդում են՝ Հայաստանը պաշտոնապես չէր հաստատել իր մասնակցությունը զորավարժություններին, իսկ փորձագիտական շրջանակներից հնչում են տեսակետներ, որ սա ռուսական կողմի հերթական ճնումն էր Հայաստանի վրա, ռուսաստանցի քաղաքական վերլուծաբան Մոդեստ Կոլերովը Tert.am-ին տված հարցազրույցում հայտարարել է, թե «այդ զորավարժություններին մասնակցությունը հակասում է վերջերս ստեղծված Հայ-ռուսական միացյալ զորախմբի մասին համաձայնագրին»:

«Այդ փորձագետը թող ռուս ժողովրդական հեքիաթները գնա իրենց տանը պատմի, եթե անցած զորավարժությունները չէին հակասում, սա էլ չէր հակասի, թող հեքիաթներ չպատմի: Այդ պայմանագրին նաև հակասում է, որ իրենք մեր թշնամիներին զենք են վաճառում, այնպես որ, թող իր պայմանագրով հանդերձ կորի, գնա»,- հակադարձեց Ռուբեն Մեհրաբյանը:

Ինչ վերաբերում է հարցի հետ կապված Հայաստանի պաշտոնական դիրքորոշմանը, ապա ըստ քաղաքագետի՝ դրանք հայտարարություններ են՝ ուղղված դեմքը փրկելուն և ոչ ավելին. «Իմաստային առումով, քաղաքական առումով դրանց քաշը հավասար է զրոյի: Նման հայտարարություններ անելով պետք չէ ունկնդրի մտավոր ունակությունները կասկածանքի ենթարկել»:

Մեր հարցին՝ եթե պնդում է, որ միակ պատճառը ռուսական կողմի ճնշումն էր, ապա ինչո՞ւ մեկ ամիս առաջ այդ նույն ճնշումը չգործադրվեց, երբ Հայաստանը մասնակցեց Վրաստանում անցկացված զորավարժություններին, Մեհրաբյանը նկատեց. «Իրավիճակ է փոխվել, ռուս-ամերիկյան հարաբերությունները թևակոխել են աննախադեպ փուլ, որի ընթացքում Վաշինգտոնը Մոսկվային ցույց է տալիս իր արժանի տեղը: Ռուսներն էլ, Հայաստանը մշտապես դիտարկելով որպես մանրադրամ, Վաշինգտոնին մանր կեղտոտություն են անում այդ ուղղությամբ: Բացի այդ, Ռուսաստանը չի զրկում իրեն սեպտեմբերի 3-ից չորս տարի անց Հայաստանին կրկին ստորացնելու հաճույքից»:

ՌԱՀՀԿ հետազոտական ծրագրերի տնօրեն, քաղաքագետ Մանվել Սարգսյանն էլ մեզ հետ զրույցում հիշեցրեց՝ Հայաստանի ձեռքերը կապող, ստրկացնող բազմաթիվ պայմանագրեր են ստորագրվել, որոնցից որևէ օգուտ չկա, բայց վնասները գնալով մեծանում են: «Հիմա այնպիսի վիճակի առաջ ենք կանգնած, որ անհրաժեշտ է նոր որոշումներ ընդունել, քաղաքականությունը վերանայել: Ոչ ոք Ռուսաստանի առջև պայման չի դրել չէ՞ Ադրբեջանին զենք չվաճառել, բայց ինչո՞ւ չեն արել: Հիմա պետք է դնել այդպիսի խնդիրներ»:

Քաղաքագետը համոզված է՝ վերջերս Սոչիում կայացած Սարգսյան-Պուտին հանդիպման ժամանակ հարցը քննարկվել է. «Պարզ է՝ այդ հարցը դրվել է, ասել են՝ մեր դուրը չի գալիս, մի մասնակցեք»:

Շողիկ Գալստյան