21.11.2024 | 23:30
Թուրքիայում ընդդիմադիր քաղաքապետներին դատապարտել են ազատազրկման «ահաբեկչության» մեղադրանքով
«Տրոյկա Դիալոգ»-ը միշտ գործել է թափանցիկ. Ռուբեն Վարդանյանի գրասենյակ
Հասարակություն
06.03.2019 | 10:35
«Տրոյկա Դիալոգ»-ը միշտ գործել է «թափանցիկության և ֆինանսական հաշվետվողականության միջազգային ստանդատներին համապատասխան»։ Այս մասին հայտարարել է գործարար, բարերար Ռուբեն Վարդանյանի գրասենյակը՝ Կազմակերպված հանցավորության և կոռուպցիայի լուսաբանման նախագծի (OCCRP) և գործընկեր լրատվամիջոցներ մի շարք հրապարակումներից հետո։
«Վարդանյան ընտանիքը իր կարողությունների մեծ մասը բարեգործական նախագծերում ներդնելու պարտավորություն է ստանձնել դեռ 2000-ականների կեսերին», – հայտարարել է Ռուբեն Վարդանյանի գրասենյակը։
Հիշեցնենք, որ կազմակերպված հանցավորության և կոռուպցիայի հետաքննության միջազգային ծրագրի (OCCRP) հետաքննող լրագրողները պնդում են, որ ժամանակին ռուսական խոշորագույն ներդրումային բանկերից «Տրոյկա Դիալոդ»-ը մասնակցել է մի սխեմայի, որի միջոցով շուրջ 9 մլրդ դոլար է «լվացվել»:
Հետաքննության համաձայն՝ այդ սխեման, որը լրագրողները «Տրոյկա Լվացքատուն» են կոչել, կազմակերպված հանցավորության հետ կապ ունեցող մարդկանց և կոռուպցիոներներին թույլ է տվել խուսափել հարկերից և թաքցնել արտասահմանում գտնվող իրենց ունեցվածքը:
Ըստ հետաքննության՝ այդ սխեմայից օգտվող անձանցից է թավջութակահար Սերգեյ Ռոլդուգինը, որին ՌԴ նախագահ Վլադիմիր Պուտինն իր ընկերն էր անվանում: Ի դեպ՝ նրա անունը հիշատակվել է նաև «Պանամական թղթապանակում», որում նշվում է, որ Ռոլդուգինի անունով շուրջ 2 մլրդ դոլար է փոխանցվել:
«Տրոյկա Դիալոգը», հետաքննող լրագրողների պնդմամբ, 2000-ականների կեսերին ավելի քան 75 օֆշորային ընկերությունների ցանց է ստեղծել, որոնք հաշիվներ են բացել, մասնավորապես, լիտվական Ukio Bankas-ում. այն 2013 թվականին փակվել է: Աղբյուրը հիշեցնում է, որ «Տրոյկա Դիալոգի» գլխավոր բաժնետերը հայտնի բանկիր Ռուբեն Վարդանյանն էր: 2012 թվականին «Տրոյկա Դիալոգը» վաճառվել է «Սբերբանկին»՝ վերանվանվելով Sberbank CIB:
Հետաքննությանն անդրադարձել է նաև «Թրանսփարենսի ինթերնեյշնլ – Ռուսաստանը»՝ ՌԴ նախագահին կոչ անելով իր աշխատակազմի վերահսկողական վարչությանը հանձնարարել՝ ստուգել «Տրոյկա Դիալոգ» ներդրումային ընկերության միջոցների լվացմանը հակազդելու հարցում Ռոսֆինմոնիթորինգի կողմից իր գործառույթների իրականացման հանգամանքը: «Թրանսփարենսի ինթերնեյշնլ – Ռուսաստանի» համաձայն՝ այն, որ «Տրոյկա Լվացքատունը» վեց տարի շարունակ անպատիժ գործել է, վկայում է ակտիվների լվացումը կանխելուն ուղղված եվրոպական և ռուսական ջանքերի անբավարարության մասին: Այս հետաքննությունը շարունակում է միջազգային «լվացքատների» աղմկահարույց մերկացումների շարքը («Մոլդովական», «Ադրբեջանական», «Ռուսական», Danske Bank-ի էստոնական մասնաճյուղի հետ կապված սկանդալ և այլն), որոնք «ցույց են տալիս տնտեսական հանցագործությունների կանխման հարցում Ռոսֆինմոնիթորինգի և այլ երկրների ֆինանսական կարգավորիչների անբավարար արդյունավետությունը»:
