18.08.2026 | 15:34
Հայ շախմատիստները 5-րդ տեղն են գրավել Միխայիլ Բոտվիննիկի գավաթում
Հենրիխ Մխիթարյանը՝ կարիերան ավարտելու ժամկետների ու մարզիչ դառնալու հավանականության մասին
27.02.2026 | 16:06
Իտալական «Ինտերի» 37-ամյա կիսապաշտպան Հենրիխ Մխիթարյանը հյուրընկալվել է Միլանի Բոկոնիի համալսարանում։ Ուսանողների հետ հանդիպմանը Հայաստանի ազգային հավաքականի նախկին ավագը պատմել է, որ դեռ մտադիր չէ ավարտել կարիերան և այս պահին իրեն չի տեսնում մարզիչի կարգավիճակում։
«Ես դեռ մտածում եմ խաղալու, այլ ոչ թե կարիերաս ավարտելու մասին։ Ես 37 տարեկան եմ։ Այդ տարիքում պետք է ավելի լավ կառավարես մարմինդ։ Այլևս 20 կամ 22 տարեկան չեմ, բայց փորձում եմ տալ առավելագույնը՝ որքան հնարավոր է երկար խաղալու և հետագայում չզղջալու համար։
Իսկ թե ինչ եմ անելու ապագայում, փորձում եմ ապրել այսօրվա օրով, հաճույք ստանալ այն ամենից, ինչ անում եմ։ Փորձում եմ հաճույքով գնալ մարզումների ու մասնակցել հանդիպումների։ Ուզում եմ առավելագույնս օգտվել ամեն պահից։ Ֆուտբոլից հետո դեռ չեմ որոշել, թե ինչ եմ անելու։ Գուցե մեկ տարի փորձեմ ոչինչ չանել ու հանգստանալ, հետո կմտածեմ, թե ինչ անել․ դա կախված է նաև այն առաջարկներից, որոնք կստանամ։
Առայժմ ինձ որպես մարզիչ չեմ տեսնում, բայց երբեք մի ասա երբեք»,- Հենրիխ Մխիթարյանի խոսքը մեջբերում է Calciomercato.com-ը։
Ավելի վաղ լուրեր էին շրջանառվում, որ Հենրիխ Մխիթարյանն այս մրցաշրջանի վերջում կարող է հեռանալ «Ինտերից», որի կազմում խաղում է 2022 թվականից և դարձել է Իտալիայի չեմպիոն, գավաթակիր, սուպերգավաթակիր ու երկու անգամ խաղացել է Չեմպիոնների լիգայի եզրափակիչում։
