27.10.2026 | 13:03
Ռուսական զորքերը կրկին հարվածել են Կիևին․ 1 մարդ զոհվել է, 15-ը՝ վիրավորվել
Ինչու Լամին Յամալը չի ստացել «Ոսկե գնդակը». France Football-ի ղեկավարի կարծիքը
27.10.2026 | 12:16
Ֆրանսիական France Football ամսագրի գլխավոր խմբագիր, «Ոսկե գնդակ» մրցանակաբաշխության ղեկավար Վենսան Գարսիան կարծիք է հայտնել, թե ինչու Իսպանիայի չեմպիոն «Բարսելոնայի» և աշխարհի ու Եվրոպայի չեմպիոն Իսպանիայի հավաքականի եզրային հարձակվող Լամին Յամալը չի ստացել տարվա լավագույն ֆուտբոլիստի մրցանակը: «Ոսկե գնդակի» համար քվեարկության արդյունքում 19-ամյա իսպանացին գրավել էր երրորդ տեղը, իսկ հաղթողի կոչումը նվաճել էր Գերմանիայի չեմպիոն Մյունխենի «Բավարիայի» ու աշխարհի առաջնության բրոնզե մեդալակիր Անգլիայի հավաքականի հարձակվող Հարի Քեյնը:
«Ենթադրում եմ, որ աշխարհի չեմպիոն դարձած Իսպանիայի հավաքականում ձայները բաժանվել են Ռոդրիի և Լամին Յամալի միջև։ Կարծում եմ՝ քվեարկության ժամանակ Ռոդրին խլեց այն ձայների մի մասը, որոնք կարող էին Լամինին անցնել։ Իսպանացի խաղացողների քվեարկության արդյունքները որոշ չափով «մշուշոտ» էին, և աշխարհի առաջնությունում Իսպանիայի հավաքականը գործում էր որպես միասնական թիմ։ Հետևաբար, դժվար էր առանձնացնել որևէ անհատական նվաճում։
Լամին Յամալը դարձավ աշխարհի չեմպիոն, բայց խփեց ընդամենը մեկ գոլ և մրցաշարը սկսեց վնասվածքով։ Ժյուրիի անդամների համար բարդ էր ընտրել իսպանացի ֆուտբոլիստներից մեկին։
Ես քվեարկել էի մի խաղացողի օգտին, որը չհաղթեց, չնայած կարծում եմ, որ նա նույնպես արժանի էր մրցանակին, բայց դուք դա կիմանաք շաբաթ օրը։ Հարի Քե՞յնը. նախևառաջ, նա իսկապես հիանալի գոլահար է։ Ժյուրին, հավանաբար, զգաց, որ նա բոլոր թեկնածուների մեջ ցուցաբերեց որակների լավագույն համադրությունը»,- Վենսան Գարսիայի խոսքը մեջբերում է Sport.es-ը։
Հիշեցնենք, որ «Ոսկե գնդակ» մրցանակաբաշխությունում Լամին Յամալը երրորդ տարին անընդմեջ ստացել էր տարվա լավագույն երիտասարդ խաղացողի մրցանակը։
Դավիթ Եղիազարյան
