27.10.2026 | 00:08
Վարդան Մինասյանն աշխատանքի է անցել Լիբանանում
Ձմեռային Օլիմպիական խաղերի մեդալային հաշվարկում Նորվեգիան հաղթեց ռեկորդով
22.02.2026 | 22:33
Իտալիայի Միլան և Կորտինա դ’Ամպեցո քաղաքներում ավարտին մոտեցող 25-րդ ձմեռային Օլիմպիական խաղերի մեդալային հաշվարկում հաղթեց Նորվեգիայի հավաքականը։ Վիճարկվեց մեդալների 116 հավաքածու։
Նորվեգացիները նվաճեցին 18 ոսկե, 12 արծաթե և 11 բրոնզե մեդալ՝ սահմանելով ռեկորդ ինչպես ոսկե մեդալների, այնպես էլ ընդհանուր մեդալների քանակով (41 մեդալ)։ Նախորդ ռեկորդները ևս սահմանել էր Նորվեգիան՝ 2022-ին նվաճելով 16 ոսկե մեդալ, իսկ 2018-ին՝ ընդհանուր 39 մեդալ։
Այս Խաղերում Նորվեգիայի հավաքականի հաղթանակին մեծապես նպաստեց Յոհանես Կլեբոն։ 29-ամյա դահուկավազորդը մասնակցեց 6 մրցման ու նվաճեց 6 ոսկե մեդալ։ Կլեբոն նաև դարձավ 11-ակի օլիմպիական չեմպիոն ու Օլիմպիական խաղերի պատմության մեջ երկրորդ ամենատիտղոսակիր մարզիկն է ամերիկացի լեգենդար լողորդ Մայքլ Ֆելպսից հետո, որն ունի 23 ոսկե մեդալ։
Մեդալային հաշվարկում երկրորդ տեղը գրավեց ԱՄՆ-ի հավաքականը, որը նվաճեց 12 ոսկե, 12 արծաթե ու 9 բրոնզե մեդալ։ Լավագույն եռյակը եզրափակեց Նիդերլանդները՝ 10 ոսկե, 7 արծաթե ու 3 բրոնզե մեդալ։
Հայաստանը 25-րդ ձմեռային Օլիմպիական խաղերին մասնակցել էր 5 մարզիկով։ Գեղասահորդներ Կարինա Ակոպովա – Նիկիտա Ռախմանին սպորտային զույգը, լեռնադահուկորդ Հարություն Հարությունյանը, դահուկորդներ Կատյա Գալստյանը և Միքայել Միքայելյանը մրցանակային տեղեր չէին գրավել։
Ձմեռային Օլիմպիական խաղերի փակման հանդիսավոր արարողությունը կկայանա փետրվարի 22-ին։
