27.10.2026 | 00:08
Վարդան Մինասյանն աշխատանքի է անցել Լիբանանում
Յոհանես Կլեբոյի 8-րդ օլիմպիական ոսկին ու Միքայել Միքայելյանի արդյունքը. ՏԵՍԱՆՅՈՒԹ
13.02.2026 | 16:18
Իտալական Միլանում և Կորտինա դ’Ամպեցոյում ընթացող 25-րդ ձմեռային Օլիմպիական խաղերում պայքարն ավարտեց նաև դահուկորդ Միքայել Միքայելյանը։
Դահուկավազքի տղամարդկանց 10 կմ ինտերվալ (ազատ ոճ) մրցաձևում Հայաստանի ներկայացուցիչը 23 րոպե 06.4 վայրկյան արդյունքով գրավեց 53-րդ տեղը։ Մրցմանը մասնակցեց 112 դահուկորդ։
Ոսկե մեդալին արժանացավ նորվեգացի Յոհանես Կլեբոն, որը գրանցեց 20։36․2 արդյունք ու դարձավ 8-ակի օլիմպիական չեմպիոն։ Արծաթե մեդալակիր դարձավ ֆրանսիացի Մատիս Դելոժը (+4,9), լավագույն եռյակը եզրափակեց նորվեգացի Էյնար Հեդեգարտը (+14,0):
Այս մրցաձևի կանանց պայքարին մասնակցել էր Հայաստանի ներկայացուցիչ Կատյա Գալստյանը, որը գրավել էր 82-րդը տեղը։
Միքայել Միքայելյանը փետրվարի 8-ին հանդես էր եկել նաև 20 կմ սկիաթլոն (10 կմ դասական/10 կմ ազատ ոճ) մրցաձևում, գրանցել էր 51:06.8 արդյունք ու զբաղեցրել 48-րդ տեղը։
Ձմեռային Օլիմպիական խաղերում Հայաստանի ներկայացուցիչներից հաջորդը հանդես կգա լեռնադահուկորդ Հարություն Հարությունյանը, որը փետրվարի 14-ին կմասնակցի հսկա ոլորավայրէջք, իսկ փետրվարի 16-ին՝ ոլորավայրէջք մրցաձևերին։
Գեղասահորդներ Կարինա Ակոպովան ու Նիկիտա Ռախմանինը սպորտային զույգերի կարճ ծրագրի որակավորման փուլում ելույթ կունենան փետրվարի 15-ին: Ազատ ծրագիրը նախատեսված է փետրվարի 16-ին:
