Կրեմլը հուսով է շարունակել Բելգրադի հետ համագործակցությունը՝ Սերբիայում իշխանության փոփոխությունից հետո

Կրեմլում հույս ունեն, որ Սերբիայի խորհրդարանական ընտրություններում հաղթանակի արդյունքում իշխանության եկող նոր քաղաքական ուժը կշարունակի Ռուսաստանի հետ կառուցողական համագործակցության կուրսը։ Մոսկվան պատրաստ է դրան, հայտարարել է ՌԴ նախագահի մամուլի քարտուղար Դմիտրի Պեսկովը։

«Ինչ վերաբերում է ընտրությունների արդյունքում իշխանության եկող նոր քաղաքական ուժին, ապա մենք հույս ենք հայտնում, որ նրա գործողությունները կառուցողականորեն ուղղված կլինեն հարաբերությունների հետագա զարգացմանը, և որ այդ քաղաքական ուժը կհասկանա՝ Ռուսաստանի հետ համագործակցությունը բխում է Սերբիայի շահերից, քանի որ դա նախևառաջ ձեռնտու է հենց Սերբիային»,- լրագրողներին ասել է Պեսկովը։

Նա վստահեցրել է, որ Ռուսաստանը, իր հերթին, մտադիր է շարունակել ամեն կերպ նպաստել Բելգրադի հետ հարաբերությունների զարգացմանը։

«Սակայն, ինչպես գիտեք, տանգոն երկուսով են պարում»,- նշել է Պեսկովը։

Կրեմլում նաև  հույս ունեն, որ Սերբիայի նախկին նախագահ Ալեքսանդր Վուչիչը, որի կուսակցությունը պարտություն է կրել խորհրդարանական ընտրություններում, կշարունակի իր ներդրումն ունենալ Ռուսաստանի հետ հարաբերությունների զարգացման գործում։

«Մենք բարձր ենք գնահատում այն ներդրումը, որն Ալեքսանդր Վուչիչն ունեցել է մեր երկկողմ հարաբերությունների զարգացման գործում։ Գիտենք, որ նա շարունակելու է իր գործունեությունը քաղաքական դաշտում, և հույս ունենք, որ նույնիսկ ընդդիմության կազմում գտնվելով՝ նա կշարունակի նպաստել երկկողմ հարաբերությունների զարգացմանը»,- ասել է Դմիտրի Պեսկովը։

Թարգմանությունը՝ Էմմա Չոբանյանի