27.10.2026 | 00:08
Վարդան Մինասյանն աշխատանքի է անցել Լիբանանում
Կարինա Ակոպովան ու Նիկիտա Ռախմանինը 14-րդ տեղը գրավեցին ձմեռային Օլիմպիական խաղերում
17.02.2026 | 01:59
Հայաստանը ներկայացնող Կարինա Ակոպովան ու Նիկիտա Ռախմանինը 14-րդ տեղը գրավեցին իտալական Միլանում և Կորտինա դ’Ամպեցոյում ընթացող 25-րդ ձմեռային Օլիմպիական խաղերում։
Գեղասահքի մրցաշարի սպորտային զույգերի պայքարում Ակոպովան ու Ռախմանինը 180.66 միավոր վաստակեցին կարճ ու ազատ ծրագրերի հանրագումարում։ Կարճ ծրագրից հետո նրանք 12-րդն էին, իսկ ազատ ծրագրում հանդես եկան հնդիկ կոմպոզիտոր Ալա Ռահմանի երաժշտության ներքո ու գրանցեցին 14-րդ արդյունքը (114. 39 միավոր)։
Օլիմպիական չեմպիոն դարձան Ճապոնիան ներկայացնող Ռիկու Միուրան ու Ռյուիտի Կիհարան՝ վաստակելով 231,24 միավոր։ Ազատ ծրագրում նրանց գրանցած արդյունքը (158,13 միավոր) աշխարհի ռեկորդ էր։ 221,75 միավորով երկրորդ տեղը գրավեցին Անաստասիա Միտյոլկինան ու Լուկա Բերուլավան, որոնք նվաճեցին Վրաստանի առաջին մեդալը ձմեռային Օլիմպիական խաղերի պատմության մեջ։ Բրոնզե մեդալին արժանացան գերմանացիներ Ֆաբյեն Հազեն ու Նիկիտա Վոլոդինը, որոնք առաջատարն էին կարճ ծրագրից հետո։ Նրանց ցուցանիշն էր 219,09 միավոր։
Անկախ Հայաստանի պատմության մեջ առաջին անգամ Հայաստանը ներկայացնող սպորտային զույգը մասնակցեց ձմեռային Օլիմպիական խաղերի գեղասահքի մրցաշարին։
Ձմեռային Օլիմպիական խաղերում Հայաստանի ներկայացուցիչներից մասնակցել էին նաև լեռնադահուկորդ Հարություն Հարությունյանը, դահուկորդներ Կատյա Գալստյանը և Միքայել Միքայելյանը, որոնք հանդես էին եկել 2-ական մրցաձևում։
