ԵՄ-ի հետ մերձեցումն անհետևանք չէ. Լավրովը՝ ՀՀ-ի նկատմամբ ՌԴ-ից հիբրիդային սպառնալիքների, եկեղեցու շուրջ իրավիճակի մասին

ԵՄ-ն Հայաստանին 15 միլիոն եվրոյի տրանշ է փոխանցել, և Երևանին կարող են ստիպել՝ վաստակել յուրաքանչյուր ցենտը։ Այս մասին հայտարարել է ՌԴ արտաքին գործերի նախարար Սերգեյ Լավրովը 2025 թվականին Ռուսաստանի դիվանագիտական ​​գործունեության արդյունքներին նվիրված մամուլի ասուլիսում, գրում է ՏԱՍՍ-ը։

«ՀՀ Ազգային ժողովի նախագահ պարոն [Ալեն] Սիմոնյանը և վերջերս տված հարցազրույցում վարչապետ [Նիկոլ] Փաշինյանը չեն ժխտել, որ Ռուսաստանի Դաշնությունից Հայաստանի նկատմամվբ գոյություն ունեն հիբրիդային սպառնալիքներ. [ենթադրաբար] հիբրիդային սպառնալիքներ, որոնք կապված են Հայ Առաքելական եկեղեցու իրավիճակի հետ։ Եվրամիության հետ մերձեցումն անհետևանք չի անցնում, քանի որ հենց ԵՄ-ն է անընդհատ անդրադառնում Ռուսաստանի կողմից ստեղծված հիբրիդային սպառնալիքներին և ֆինանսավորում տրամադրում նման ջանքերին: Վերջերս Հայաստանին տրամադրվեց 15 միլիոն եվրոյի տրանշ, և ես կասկած չունեմ, որ Բրյուսելի բյուրոկրատիան կստիպի մեր հայ ընկերներին վաստակել յուրաքանչյուր ցենտը»,- ասել է  Լավրովը՝ մեկնաբանելով Հայ Առաքելական եկեղեցու շուրջ ստեղծված կոնֆլիկտի իրավիճակը:

Մոսկվան նաև ակնկալում է, որ Ռուսաստանի հետ համագործակցության կողմնակից հայ քաղաքական գործիչները չեն ենթարկվի հետապնդումների։

«Եվ մենք ակնկալում ենք, որ Հայաստանում քաղաքական գործիչները, որոնք կողմ են հանդես գալիս Ռուսաստանի հետ համագործակցության զարգացմանն ու խորացմանը, չեն ենթարկվի հետապնդումների»,- նշել է  Լավրովը՝ անդրադառնալով Գյումրիի քաղաքապետ Վարդան Ղուկասյանի գործին ու նշել.

«Իհարկե, Վարդան Ղուկասյանի վերաբերյալ դուք բացարձակապես ճիշտ եք նշելով, որ նրան մեղադրում են Ռուսաստանի և Բելառուսի միությանը Հայաստանի միանալու հնարավորությունը քննարկելու կոչ անելու մեջ։ Ձերբակալել քաղաքական հայացքներ արտահայտելու համար, տեսակետներ, որոնք ոչ մի կերպ ուղղված չեն Հայաստանի ինքնիշխանության և տարածքային ամբողջականության խաթարմանը,  որոնք ուղղված են նրա արտաքին հարաբերությունների հնարավորությունները սեփական զարգացման շահերից ելնելով առավելագույնի հասցնելուն, իհարկե, սա լուրջ շփոթմունք և մտահոգություն է առաջացրել»։

Նա, միաժամանակ, հավելել է, որ հայ հասարակությունը պետք է լրջորեն մտածի եվրոպական դիվանագիտության ղեկավար Կայա Կալլասի հայտարարությունների շուրջ, որ Հայաստանում ընտրությունների ժամանակ կիրառվելու է «մոլդովական սցենարը»։

«Եթե եվրոպական դիվանագիտության ղեկավար Կայա Կալլասը բացահայտ խոստովանում է, որ Հայաստանում կայանալիք ընտրությունների ժամանակ կիրառվելու է մոլդովական սցենարը, եթե ես լինեի հայ հասարակության տեղում, լրջորեն կմտածեի այդ մասին»,- հայտարարել է Լավրովը։

Ըստ նրա՝ Մայա Սանդուի կուսակցությունը պարտվել է Մոլդովայում և հաղթել Եվրոպայի ընտրատեղամասերում «խախտումների շնորհիվ»։

Թարգմանությունը՝ Էմմա Չոբանյանի