Քաղաքականություն
29.10.2026 | 20:10ԱԺ-ում տեղի ունեցած ծեծկռտուքի մասնակից ՔՊ-ական պատգամավոր Տարոն Չախոյանը Factor TV-ի հետ զրույցում հերքեց հայհոյանք հնչեցնելու մասին պնդումները։ «Կոռեկտության սահմաններից դուրս բացարձակապես որևէ բառ չի հնչել»,- վստահեցրեց Չախոյանը։
Նա պնդեց, որ «Ուժեղ Հայաստան» խմբակցության պատգամավոր Գառնիկ Դավթյանն առաջինն է հարվածել իրեն՝ բռնելով կոկորդից։
«Գառնիկին ո՞վ է տվել այդ իրավունքը Ազգային ժողովի պատգամավորի կոկորդից բռնել կամ ձեռք բարձրացնել»,- ասաց Չախոյանը։
ՔՊ-ական պատգամավորը խորհրդարանում տեղի ունեցած ծեծկռտուքը որակեց խուլիգանական պահվածք՝ ընդգծելով, որ ԱԺ-ն փողոցային հարցեր լուծելու վայր չէ։
«Եթե այդ մարդկանց կարծիքով իրենք մանդատ են ստացել, որ գան այս նիստերի դահլիճում փողոցային բարքեր-վարքերով փորձեն հարցեր լուծել, իրենք չարաչար սխալվում են»,- հայտարարեց նա։
Չախոյանը նաև պնդեց, որ Հայաստանին անհրաժեշտ է առողջ քննադատություն հնչեցնող ընդդիմություն, ոչ թե ուժ, որը դեմ է երկրի ապաշրջափակմանը։ Նրա գնահատմամբ՝ ընդդիմությունը պետք է փոխվի։
Միաժամանակ նա հերքեց պնդումները, թե ԱԺ-ում տեղի ունեցած միջադեպը իշխանության կողմից նախապես պլանավորված էր։ Խոսելով միջադեպի հնարավոր հետևանքների մասին՝ Չախոյանը հայտարարեց․ «Հուսով եմ՝ սա դաս կլինի ընդդիմության համար, այն «Ուժեղ Հայաստանի» ուժեղ տղաների համար, ու կհասկանան, որ այսուհետև պատգամավորի վրա ձեռք բարձրացնելը իրենց վրա շատ թանկ կարող է նստել»,- ասաց իշխանական պատգամավորը։
Հարցազրույցն ամբողջությամբ՝ տեսանյութում։
Արփի Հակոբյան
