29.10.2026 | 13:39
Պենտագոնը հրաժարվել է հետաքննել Ուկրաինայում Starlink-ի աշխատանքի խափանումները
Իսպանիայում արագընթաց գնացքների բախման հետևանքով զոհերի թիվը հասել է 39-ի
Քաղաքականություն
19.01.2026 | 14:12
Իսպանիայի հարավում կիրակի երեկոյան երկու արագընթաց գնացքների բախման հետևանքով 39 մարդ է զոհվել։ 123 մարդ վիրավորվել է, որոնցից հինգը՝ շատ ծանր, իսկ 24-ը՝ ծանր վիճակում են, հայտնել է Իսպանիայի Ներքին գործերի նախարարության մամուլի խոսնակը։ Իսպանական լրատվամիջոցների փոխանցմամբ՝ վիրավորների թվում երեխաներ կան, գրում է DW-ի ռուսական ծառայությունը։
Ողբերգությունը տեղի է ունեցել հունվարի 18-ի երեկոյան Իսպանիայի Կորդոբա նահանգում։ Մալագայից Մադրիդ մեկնող գնացքը դուրս է եկել գծերից՝ բախվելով հանդիպակաց գնացքին։
Վթարի պատճառը դեռևս հայտնի չէ։ Իսպանիայի տրանսպորտի նախարար Օսկար Պուենտեն լրագրողներին ասել է, որ գնացքի վթարը տեղի է ունեցել երկաթուղու ուղիղ հատվածում, որն ամբողջությամբ վերանորոգվել էր, և առաջին գնացքը, որը դուրս է եկել գծերից, «գործնականում նոր» էր։ Հաշվի առնելով այս փաստերը՝ նա վթարն անվանել է «չափազանց տարօրինակ»։
«Երկաթուղային փորձագետները շատ զարմացած են այս վթարից, քանի որ այն շատ տարօրինակ է և այս փուլում շատ դժվար է բացատրել»,- ասել է նա։
Տուժած գնացքներից մեկի օպերատորը հայտարարել է, որ Iryo գնացքի վերջին ստուգումը կատարվել է հունվարի 15-ին։
Իսպանական լրատվամիջոցների տվյալներով՝ երկու գնացքներում, ընդհանուր առմամբ, 400 մարդ է եղել:
Իսպանիայի վարչապետ Պեդրո Սանչեսը հայտարարել է, որ ուշադիր հետևում է իրավիճակին: Նա կայցելի աղետի վայր՝ «առաջին ձեռքից տեղեկատվություն ստանալու» համար: Իսպանիայի թագավորական ընտանիքը, այլ առաջնորդների հետ միասին, այդ թվում՝ Ֆրանսիայի նախագահ Էմանուել Մակրոնի և Եվրահանձնաժողովի նախագահ Ուրսուլա ֆոն դեր Լեյենի, ցավակցություն են հայտնել։
Թարգմանությունը՝ Էմմա Չոբանյանի
