Հասարակություն
29.10.2026 | 13:17
ՊԵԿ նախկին նախագահ Գագիկ Խաչատրյանը ևս երկու ամիս կմնա կալանքի տակ։ Երևանի ընդհանուր իրավասության քրեական դատարանը երեկվանից քննում է Խաչատրյանի խափանման միջոցի հարցը, արդեն այսօր դատարանը որոշում կայացրեց ևս 2 ամսով երկարաձգել նրա նկատմամբ ընտրված խափանման միջոց կալանավորումը։
Սեպտեմբերի 1-ին հայտնի դարձավ, որ Խաչատրյանը ձերբակալվել է և տեղափոխվել ՀՀ քննչական կոմիտե։ Դատախազությունը հայտարարեց, որ դատաբժշկական հանձնաժողովային փորձաքննությունների արդյունքներով արձանագրվել է, որ Խաչատրյանը կարիք չի ունեցել վիրահատական միջամտության, դրա անհրաժեշտությունը ներկա պահին կարող է դիտարկվել նրա` ՄՌՏ հետազոտության ենթարկվելուց հետո, բայց Խաչատյանը հրաժարվել է ՄՌՏ հետազոտությունից: Դրան զուգահեռ Խաչատրյանի պաշտպանական կողմը նրա ձերբակալումից կադրեր հրապարակեց, որտեղ երևում է, թե ինչպես են պատգարակով տեղափոխում ՊԵԿ նախկին նախագահին։ Փաստաբանների խոսքով՝ Խաչատրյանի առողջական վիճակը շատ ծանր է և նրան բուժում է անհրաժեշտ։ Դատարանը, սակայն, ձերբակալման հաջորդ օրը երկու ամսով կալանավորելու որոշում կայացրեց։
Հիշեցնենք՝ Գագիկ Խաչատրյանը մեղադրվում է պաշտոնեական դիրքի օգտագործմամբ առանձնապես խոշոր չափերով յուրացման, վատնման և դրա կազմակերպման, առանձնապես խոշոր չափերով փողերի լվացմանն օժանդակելու, պաշտոնեական լիազորությունները չարաշահելու, առանձնապես խոշոր չափերով կաշառք ստանալու, պաշտոնեական կեղծիքներ կատարելու համար։ Դատարանում քննվող գործի շրջանակներում նրան վերագրվում է 9 դրվագ հանցագործություն, որի հետևանքով պետությանը պատճառված վնասը և կաշառքի առարկա հանդիսացած գումարը կազմում է շուրջ 20 միլիարդ ՀՀ դրամ:
Խաչատրյանի գործը 2020 թվականից դատարանում է։ Արդեն երրորդ դատավորն է քննում այն։ Առաջին անգամ գործը քննել է Երևանի քրեական դատարանի դատավոր Արթուր Մկրտչյանը, սակայն 65 տարին լրանալու կապակցությամբ անցել է թոշակի, լիազորությունները դադարել են։ Դրանից հետո գործը մակագրվել է Հակակոռուպցիոն դատարանի դատավոր Գիվի Հովհաննիսյանին, վերջինիս լիազորությունները ԲԴԽ-ն դադարեցել է։ Այժմ գործով երրորդ դատավորը Վարդգես Ստեփանյանն է։
Գահիկ Խաչատրյանը չի ընդունում առաջադրված մեղադրանքը։
Ռոզա Վարդանյան
