Ղարաբաղից տեղահանվածների սոցիալական աջակցության երկու ծրագիր կերկարաձգվի մինչև 2027 թվականը

Կառավարության որոշմամբ երկարաձգվել են Ղարաբաղից տեղահանված անձանց սոցիալական աջակցության երկու ծրագրերի ժամկետները։ Առանձին խմբերի շահառուները կշարունակեն աջակցություն ստանալ մինչև 2027 թվականի հունիսը ներառյալ։ 2027 թվականի հունվարից մարտ ամսական աջակցությունը կկազմի 30 հազար դրամ, իսկ ապրիլից հունիս՝ 15 հազար դրամ։ Այս ծրագրից օգտվում է շուրջ 46 հազար մարդ։

Մյուս ծրագրով՝ Ղարաբաղից տեղահանված կարիքավոր ընտանիքներին տրամադրվող ամսական 40+10 հազար դրամ աջակցությունը կշարունակվի մինչև 2027 թվականի դեկտեմբերը ներառյալ։ Ծրագրից հոկտեմբերին օգտվել է 8600 ընտանիք։

Աշխատանքի և բարեկեցության նախարարության հաղորդագրությունը՝ ստորև․

«Կառավարության այսօրվա որոշմամբ երկարաձգվել են Ղարաբաղից տեղահանված անձանց սոցիալական աջակցության երկու ծրագրերի ժամկետները։

Մասնավորապես, Ղարաբաղից տեղահանված առանձին խմբերի անձանց աջակցության ծրագրի շահառուները կշարունակեն աջակցություն ստանալ մինչև 2027 թվականի հունիս ամիսը ներառյալ։ 2027 թվականի հունվարից մարտը ներառյալ աջակցության չափը կկազմի ամսական 30,000 դրամ, իսկ 2027 թվականի ապրիլից հունիս ամիսները ներառյալ՝ 15,000 դրամ։ 2026 թ․ հոկտեմբեր ամսվա տվյալներով՝ ծրագրից օգտվում է շուրջ 46,000 անձ։

Նշենք, որ այս միջոցառման շրջանակում առանձին խումբ են դիտարկվում՝

· 1-ին կամ 2-րդ խմբի հաշմանդամություն ունեցող կամ ֆունկցիոնալության սահմանափակման խորը կամ ծանր աստիճան ունեցող անձինք,

· 63 և ավելի տարեկան անձինք,

· կերակրողին կորցնելու դեպքում նպաստ կամ կենսաթոշակ ստացող անձինք,

· հանրակրթական ուսումնական հաստատություններում կամ նախնական մասնագիտական (արհեստագործական) կամ միջին մասնագիտական ուսումնական հաստատությունում սովորող 18 տարին լրացած անձինք,

· մինչև 18 տարեկան երեխաները։

Ղարաբաղից տեղահանված կարիքավոր ընտանիքներին տրվող լրացուցիչ հրատապ աջակցության միջոցառման ժամկետը ևս կերկարաձգվի․ շահառուները կշարունակեն 40+10 հազար դրամ աջակցություն ստանալ մինչև 2027 թվականի դեկտեմբեր ամիսը ներառյալ։ Միջոցառման շրջանակում 2026 թ․ հոկտեմբեր ամսին աջակցություն է տրամադրվել 8,600 ընտանիքի։

Ծրագրի շահառուներն են այն ընտանիքները, որոնց մեկ անդամի ամսական եկամտի չափը ցածր է 55,000 դրամից․ մեկ անդամի ամսական եկամտի չափը որոշվում է ընտանիքի ամսական եկամուտների հանրագումարի և ընտանիքի անդամների թվի հարաբերությամբ։

Ղարաբաղից տեղահանված անձինք հնարավորություն ունեն օգտվելու սոցիալական աջակցության գործող այլ ծրագրերից և միջոցառումներից՝ դրանցով սահմանված պահանջներին համապատասխանելու դեպքում»։