23.12.2025 | 21:58
Երևանում և 6 մարզում էլեկտրաէներգիայի անջատումներ կլինեն
Դադարեցվել է Կապսի ջրամբարի շինարարությունը․ աշխատակիցներին տուն են ուղարկել
Տնտեսություն
23.12.2025 | 18:24
Շուրջ տասը օր է՝ դադարեցված են Շիրակի մարզի Կապսի ջրամբարի շինաշխատանքները։ Այս մասին Factor.am-ին տեղեկացրել է աշխատակիցներից մեկը՝ նշելով, որ իրեն և մյուս աշխատակիցներին բանավոր տեղեկացրել են այլևս աշխատանքի չներկայանալ։
Factor.am-ին այսօր նաև հայտնի դարձավ, որ կառուցապատող ընկերության հետ Տարածքային կառավարման և ենթակառուցվածքների նախարարությունը պայմանագիրը լուծարելու գործընթաց է սկսել։ Տեղեկությունը Factor.am-ի հետ զրույցում հաստատեց նաև ՏԿԵ նախարարության մամուլի խոսնակ Սոնա Հարությունյանը։
«Մեկնարկել է պայմանագրի լուծարման գործընթաց նախարարության նախաձեռնությամբ։ Պայմանագրի ժամկետները խախտվել են, նախատեսված աշխատանքները գրաֆիկի համաձայն չեն կատարվել։ Այս պահի դրությամբ 16 տոկոսն է կատարվել աշխատանքների»,- ասաց Սոնա Հարությունյանը։
Նշենք, որ շինաշխատանքներն իրականացնում էր չինական «Շանսի Քոնսթրաքշն Ինվեսթմենթ Գրուպ»-ը։ Նախատեսվում էր աշխատանքներն ավարտել 2026-ի ապրիլին։
Ջրամբարի շինարարության համար գերմանական KfW բանկը 68.5 մլն եվրոյի վարկ է տրամադրել, ևս 26.7 մլն եվրո էլ հատկացրել է Հայաստանի կառավարությունը։ Առաջին փուլով նախատեսվում է, որ ջրամբարը 25 մլն խորանարդ մետր ծավալ կունենա, երկրորդ փուլում արդեն տարողությունը պետք է հասնի 60 մլն խորանարդ մետրի:
Նարեկ Կիրակոսյան
