ԱՄՆ վերաքննիչ դատարանը կասեցրել է որոշումը, որը Պետդեպին պարտավորեցվել էր «Գրին քարտի» խաղարկություն անցկացնել

ԱՄՆ-ի Իններորդ շրջանի վերաքննիչ դատարանը (Սան Ֆրանցիսկո, Քալիֆորնիա) կասեցրել է առաջին ատյանի դատարանի որոշումը, որը Պետքարտուղարությանը պարտավորեցնում էր վերսկսել «Գրին քարտի» խաղարկությունը։

San Francisco Chronicle-ի հաղորդմամբ՝ երեք դատավորից կազմված կոլեգիան որոշել է, որ իրավաբանական ընկերությունը, որի հայցի հիման վրա կայացվել էր նախորդ որոշումը, բավարար իրավական հիմքեր չունի այս գործին մասնակցելու համար։ Այսպիսով, Դոնալդ Թրամփի վարչակազմն առայժմ կարող է չվերսկսել ծրագիրը, որի շրջանակում ամեն տարի խաղարկվում էր ԱՄՆ-ում մշտական բնակության մինչև 55 հազար թույլտվություն, գրում է The Insider-ը։

Վերաքննիչ դատարանի դատավորներն ընդգծել են, որ հավանություն չեն տալիս Պետքարտուղարության՝ վիճակախաղը դադարեցնելու որոշմանը, սակայն բավարարել են բողոքը՝ զուտ դատավարական հիմքերով։

Այս գործով նախորդ որոշումը հոկտեմբերի 14-ին կայացրել էր Քալիֆորնիա նահանգի Սան Դիեգո քաղաքի դաշնային դատավորը։ Նա բավարարել էր Red Eagle Law իրավաբանական ընկերության հայցը, որը նախկինում ներկայացրել էր վիզա ստանալու դիմորդների շահերը, և պարտավորեցրել Պետքարտուղարությանը բացել գրանցումը՝ 2027 թվականի «Գրին քարտի» խաղարկությանը մասնակցել ցանկացողների հայտերն ընդունելու համար։

Red Eagle Law-ի փաստաբան Քերթիս Մորիսոնը San Francisco Chronicle-ին հայտնել է, որ ընկերությունը նոր հայց կներկայացնի, այս անգամ՝ կոնկրետ օտարերկրացու անունից, որը ցանկանում է մասնակցել վիճակախաղին։

«Հիասթափեցնող է, որ վերաքննիչ դատարանն ավելի կարևոր է համարել սահմանափակել մեր փոքր իրավաբանական ընկերության՝ ներգաղթյալներին օգնություն ցուցաբերելու հնարավորությունները, քան խոչընդոտել վարչակազմի հակաիմիգրացիոն ծրագրին»,- ասել է Մորիսոնը։

Դոնալդ Թրամփի վարչակազմը, որը դեմ է «Գրին քարտի» վիճակախաղի անցկացմանը, սահմանված ժամկետում չի բացել հայտերի ընդունման գրանցումը, իսկ սեպտեմբերին հայտարարել էր, որ դա անելու համար արդեն չափազանց ուշ է։