29.06.2026 | 18:05
Գերմանիայի հյուսիսում կրակոցների հետևանքով առնվազն 5 մարդ է զոհվել
Էրդողանը հայտնել է, որ Թուրքիայի ռազմական ինքնաթիռի կործանման հետևանքով կան զոհեր. ինքնաթիռում 20 մարդ է եղել
Քաղաքականություն
11.11.2025 | 18:43
Վրաց-ադրբեջանական սահմանին՝ Վրաստանի տարածքում վթարի է ենթարկվել Թուրքիայի պաշտպանության նախարարությանը պատկանող բեռնատար ինքնաթիռ, որն Ադրբեջանից Թուրքիա էր թռչում։ Թուրքական գերատեսչությունը հայտարարել է, որ Վրաստանի հետ համագործակցությամբ որոնողական-փրկարարական աշխատանքներ են սկսվել։
Չնայած դեռևս պաշտոնական հայտարարություն չի տարածվել այն մասին, որ վթարի հետևանքով զինվորներ են զոհվել, Թուրքիայի նախագահ Ռեջեփ Թայիփ Էրդողանը, ելույթ ունենալով իշխող Արդարություն և զարգացում կուսակցության Կոնգրեսի կենտրոնում, հայտնել է զոհերի մասին։
«Այսօր խորը վշտով տեղեկացանք, որ C130 ռազմական ինքնաթիռը, որն Ադրբեջանից մեր երկիր էր ուղևորվում, վթարի է ենթարկվել Վրաստան-Ադրբեջան սահմանին։ Մեր ջանքերը բեկորները գտնելու ուղղությամբ շարունակվում են՝ ազգային իշխանությունների հետ համակարգված»,- ասել է նա։
Ադրբեջանի նախագահ Իլհամ Ալիևն իր հերթին ցավակցություն է հայտնել Էրդողանին և Թուրքիային՝ խոսելով զոհերի մասին։
«Խորապես ցնցված ենք Գյանջայից թռիչք իրականացնող Թուրքիայի ռազմաօդային ուժերի ռազմական տրանսպորտային ինքնաթիռի վթարի հետևանքով զինծառայողների մահվան լուրից։ Այս դժվարին ժամանակներում կիսում եմ ձեր վիշտը և Ադրբեջանի ժողովրդի և իմ անունից խորին ցավակցություն եմ հայտնում ձեզ, զոհվածների ընտանիքին և ընկերներին, ինչպես նաև Թուրքիայի եղբայրական ժողովրդին այս ողբերգության կապակցությամբ»,- ասվում է Ալիևի նամակում։
Մինչդեռ, Վրաստանի Ներքին գործերի նախարարությունը հայտնում է, որ թուրքական ռազմական C-130 տրանսպորտային ինքնաթիռը վթարի է ենթարկվել Վրաստանի տարածքում՝ Ադրբեջանի հետ սահմանից 5 կմ հեռավորության վրա, Սիղնախիի մունիցիպալիտետում։
Թուրքիայի պաշտպանության նախարարությունը ևս մեկ հայտարարություն է տարածել միջադեպի կապակցությամբ՝ հայտնելով, որ ինքնաթիռում 20 մարդ է եղել։
Թարգմանությունը՝ Էմմա Չոբանյանի
