ՀՀ նախագահի և արքայազն Աբդուլազիզ բին Թալալի հովանու ներքո և մասնակցությամբ Երևանում կկայանա 1 մլն դոլար մրցանակային ֆոնդով Արքայազն Թալալի միջազգային մրցանակաբաշխությունը

Հոկտեմբերի 28-ին՝ COP17-ի ընթացքում, կմեծարվեն մարդկային զարգացման և մաքուր էներգիայի ոլորտների չորս միջազգային ծրագրեր։

Էր Ռիադ —Հայաստանի Հանրապետության նախագահ Վահագն Խաչատուրյանի բարձր հովանու ներքո և մասնակցությամբ՝ «Արաբական ծոցի զարգացման ծրագիր» (AGFUND) կազմակերպությունը հոկտեմբերի 28-ին Երևանի Դվին Մյուզիք Հոլում կանցկացնի «Մարդկային զարգացման ոլորտում Արքայազն Թալալի անվան միջազգային մրցանակաբաշխության» 27-րդ արարողությունը։

Միջոցառմանը կմասնակցեն AGFUND-ի տնօրենների խորհրդի և մրցանակաբաշխության կոմիտեի նախագահ, Նորին Արքայական Բարձրություն արքայազն Աբդուլազիզ բին Թալալ բին Աբդուլազիզ Ալ Սաուդը, Նորին Մեծություն Իսպանիայի թագուհի Սոֆիան (մրցանակաբաշխության կոմիտեի անդամ), ինչպես նաև կոմիտեի անդամ այլ բարձրաստիճան հյուրեր։ Արարողության ընթացքում կմեծարվեն 2025 թվականի մրցանակային շրջանի հաղթող ճանաչված կազմակերպություններն ու անհատները։ Այս շրջանի թեման ՄԱԿ-ի Կայուն զարգացման 7-րդ նպատակն էր՝ «Մատչելի և մաքուր էներգիա» (ԿԶՆ 7)։

Երևանը հյուրընկալող քաղաք է ընտրվել՝ հաշվի առնելով նույն ժամանակահատվածում ՄԱԿ-ի «Կենսաբանական բազմազանության մասին» կոնվենցիայի կողմերի 17-րդ համաժողովի (COP17) անցկացումը։ Այս համընկնումն ընդգծում է մրցանակի թեմայի և շրջակա միջավայրի պահպանությանն ու կայուն զարգացմանն ուղղված միջազգային ջանքերի սերտ կապը՝ շեշտադրելով նորարար լուծումների դերը մարդկանց կյանքի որակի բարելավման և բնական պաշարների պահպանման գործում։

Արարողության ժամանակ կպարգևատրվեն մաքուր էներգետիկայի և մարդկային զարգացման ոլորտում նորարար լուծումներ առաջարկած չորս նախագծեր։ Այս ծրագրերն ընդգրկում են հետևյալ ուղղությունները՝ կլիմայակայուն ջրամատակարարման համակարգեր, պարենային անվտանգություն և կենսապահովման կայուն միջոցներ, թափոններից կենսավառելիքի ստացման տեխնոլոգիաներ, ինչպես նաև արևային էներգիայով աշխատող ոռոգման ծառայություններ փոքր ֆերմերային տնտեսությունների համար։ Այս նախաձեռնություններն ակնառու կերպով ցույց են տալիս, թե ինչպես մաքուր էներգիայի հասանելիությունը կարող է նպաստել առաջնային կարիքների բավարարմանը, ընդլայնել արտադրական հնարավորությունները և բարձրացնել տեղական համայնքների կյանքի որակը։

Մրցանակային ընդհանուր ֆոնդը կազմում է 1 միլիոն ԱՄՆ դոլար և բաշխվում է չորս անվանակարգերում՝ գնահատելով ՄԱԿ-ի գործակալությունների, միջազգային ու տարածաշրջանային կազմակերպությունների, ազգային մակարդակի հասարակական կազմակերպությունների, պետական մարմինների, սոցիալական ձեռնարկությունների և անհատների իրականացրած ծրագրերը։ Այս բազմազանությունը թույլ է տալիս տեսանելի դարձնել զարգացման տարբեր մոտեցումներն ու նպաստել հաջողված լուծումների տարածմանը։

Մրցանակը հիմնադրվել է 1999 թվականին՝ որպես Մարդկային զարգացման առաջատար ծրագրերի AGFUND-ի միջազգային մրցանակ։ Այն հիմնված է մարդկանց մեջ ներդրումներ կատարելու, ինչպես նաև աղքատության և սոցիալական բացառման հաղթահարման գործում նորարարությունը խրախուսելու տեսլականի վրա։ Հետագայում այն վերանվանվել է AGFUND-ի հիմնադիր արքայազն Թալալ բին Աբդուլազիզի պատվին՝ հարգանքի տուրք մատուցելով նրա մարդասիրական ժառանգությանն ու մարդկային զարգացման գործում ունեցած ներդրմանը։

Մրցանակաբաշխությունը բացահայտում է հաջողված նախագծերը, արժևորում դրանց հեղինակներին ու կազմակերպություններին, ինչպես նաև տարածում նրանց փորձն ու լուծումները, որպեսզի դրանք կիրառվեն այլ վայրերում ևս՝ շոշափելի փոփոխություն բերելով առավել կարիքավոր խմբերի կյանքում։
2017 թվականից ի վեր մրցանակի թեմաները համապատասխանեցվում են ՄԱԿ-ի մինչև 2030 թվականի Կայուն զարգացման օրակարգին։ Յուրաքանչյուր մրցանակային փուլում կոմիտեն ընտրում է ԿԶՆ-ներից որևէ մեկին առնչվող թեմա՝ ուշադրության կենտրոնում պահելով գործնական այն նախաձեռնությունները, որոնք նպաստում են այդ նպատակների իրագործմանը։

Շարունակելով այս մոտեցումը՝ հաջորդ՝ 2026 թվականի մրցանակային շրջանը նվիրված է լինելու «Առողջություն և բարեկեցություն» թեմային (ԿԶՆ 3)՝ գնահատելով բոլոր տարիքի մարդկանց համար առողջ կյանք ապահովող և բարեկեցությունը խթանող ծրագրերը։

Վճարովի բովանդակություն