03.11.2026 | 16:49
3 ամիս սպասել եմ էս հանդիպմանը․ Ագնեսա Խամոյանը՝ ՔԿ նախագահին․ ՏԵՍԱՆՅՈՒԹ
Երևանում 12 անձ սուր աղիքային վարակով տեղափոխվել է հիվանդանոց․ սննդի օբյեկտի գործունեությունը կասեցվել է
Հասարակություն
18.09.2025 | 17:52
Հայաստանի սննդամթերքի անվտանգության տեսչական մարմինը տեղեկացնում է, որ կասեցվել է անհատ ձեռնարկատեր Սամվել Շահբազյանին պատկանող հանրային սննդի օբյեկտի (ք. Երևան, փ. Կոմիտաս 51) արտադրական գործունեությունը։
ՍԱՏՄ-ի տարածած հաղորդագրության մեջ նշված է, որ հիվանդությունների վերահսկման և կանխարգելման ազգային կենտրոնից ստացված հաղորդագրության համաձայն՝ Ինֆեկցիոն հիվանդությունների ազգային կենտրոն է ընդունվել 12 անձ՝ սուր աղիքային վարակ ախտորոշմամբ։ Բոլորը սնվել էին նշված օբյեկտում։
Տեսչական մարմնի արագ արձագանքման բաժնի և Երևանի կենտրոնի տեսուչների իրականացրած ստուգման արդյունքում պարզվել է, որ արտադրական գործընթացները կազմակերպվել են սննդամթերքի հիգիենայի նկատմամբ սահմանված պահանջների կոպիտ խախտումներով։
Մասնավորապես՝ օբյեկտը ապահովված չի եղել տաք ջրով, օդափոխության համակարգը գտնվել է կեղտոտ վիճակում, պատերը պատրաստված չեն եղել լվացվող և ախտահանվող նյութերից, մուտքի դուռը բացվել է անմիջապես խոհանոցային տարածք և չի ունեցել միջատապաշտպան ցանց, սննդային թափոնների բեռնարկղը կառուցված չի եղել այնպես, որ հնարավոր լինի մաքրել և ախտահանել, սարքավորումները և գործիքները չեն ենթարկվել պատշաճ մաքրման և ախտահանման։
Օբյեկտի գործունեությունը կասեցվել է, սահմանվել է ժամկետ խախտումները վերացնելու համար։ Նմուշառված սննդամթերքի լաբորատոր փորձաքննության արդյունքները կհրապարակվեն։
