28.03.2026 | 15:00
ՀՀ դեսպանը մասնակցել է «Հայկական արվեստն ու աշխարհը» խորագրով ամենամյա դասախոսությանը
Պակիստանը հաստատում է․ Ադրբեջանը պայմանագիր է կնքել 40 միավոր JF-17 կործանիչի գնման համար
Քաղաքականություն
09.06.2025 | 10:29
Ադրբեջանը ընդլայնել է պակիստանյան JF-17 Thunder կործանիչների գնման պատվերը 16-ից հասցնելով 40-ի, ինչը Պակիստանի պաշտպանական արդյունաբերության պատմության մեջ արտահանման ամենամեծ պայմանագիրն է։ Այս մասին գրում է Defence Industry Europe-ը։
Գործարքը 4.6 միլիարդ դոլարի ավելի լայն պաշտպանական համաձայնագրի մի մասն է, որը զուգորդվում է 2 միլիարդ դոլարի ներդրումային փաթեթի հետ․ այն պաշտոնապես հաստատել է Պակիստանի կառավարությունը իր սոցիալական ցանցերի միջոցով։
Մասնավորապես, Պակիստանի կառավարության X-ի միկրոբլոգում նշվում է, որ երկրի վարչապետ Շահբազ Շարիֆի ղեկավարությամբ մի շարք կարևոր դիվանագիտական նվաճումների է հասել։
«Ադրբեջանը ստորագրել է 2 միլիարդ դոլարի ներդրումային և 4.6 միլիարդ դոլարի պաշտպանական համաձայնագիր՝ 40 պակիստանյան JF-17 ինքնաթիռ գնելու համար, մինչդեռ Պակիստանի և Իրանի միջև առևտուրը, կանխատեսումների համաձայն, 3 միլիարդ դոլարից կաճի մինչև 10 միլիարդ դոլարի»,-ասվում է գրառման մեջ։
Լրատվամիջոցը գրում է, որ այս համաձայնագիրը Ադրբեջանը դարձնում է JF-17 Thunder շարքի ամենամեծ արտահանման հաճախորդը՝ գերազանցելով նախկին այնպիսի հաճախորդներին, ինչպիսիք են Նիգերիան և Մյանման։
Pakistan Aeronautical Complex-ի և Չինաստանի Chengdu Aircraft Corporation-ի կողմից համատեղ մշակված JF-17-ը համարվում է ժամանակակից օդուժի հնարավորություններն ընդլայնել ցանկացող երկրների համար մատչելի լուծում։ Ադրբեջանը կստանա Block III տարբերակը՝ JF-17-ի ամենաառաջադեմ տարբերակը։ Ինքնաթիռը համատեղելի է PL-15 և PL-10 հեռահար օդ-օդ դասի հրթիռների հետ։
JF-17 Block III-ը, որն առաջին թռիչքն իրականացրել է 2019 թվականին թռիչք, զգալի տեխնոլոգիական բարելավումներ ունի նախորդ տարբերակների համեմատ: Պաշտպանության ոլորտի վերլուծաբանները ենթադրում են, որ Ադրբեջանը կարող է հարթակում ինտեգրել թուրքական արտադրության Gokdogan և Bozdogan հրթիռները, ինչը արտացոլում է Պակիստանի, Թուրքիայի և Ադրբեջանի միջև աճող պաշտպանական կապերը:
Պորտալի տեղեկություններով՝ ինքնաթիռը կհագեցվի նաև ASELPOD նշանառության խցիկներով, ինչը Ադրբեջանը կդարձնի այս տեխնոլոգիայի ընտրյալ օգտագործողներից մեկը՝ Պակիստանի և Նիգերիայի հետ միասին:
Ավելի վաղ լրատավիջոցները տեղեկություններ էին տարածել, որ Բաքվի և Իսլամաբադի միջև ստորագրվել է 4,2 միլիարդ դոլարի համաձայնագիր JF-17 Thunder Block III ինքնաթիռների գնման վերաբերյալ, որը կողմերը չէին հաստատել։
Հիշեցնենք, որ 2024-ի սեպտեմբերին Ադրբեջանի նախագահ Իլհամ Ալիևին ներկայացվել էր Պակիստանից գնված JF-17C Block-III ինքնաթիռը։
Թարգմանությունը՝ Էմմա Չոբանյանի
