«Անընդունելի են կողմնակալ քայլերը»․ Բայրամովը դժգոհել է ՀՀ-ին ԱՄՆ-ի աջակցությունից

Ադրբեջանի ԱԳ նախարար Ջեյհուն Բայրամովը հայտարարել է, որ Բաքուն 2024 թվականին տեսել է Հայաստանին ԱՄՆ-ի միակողմանի աջակցության փաստեր։ Այս մասին ադրբեջանցի նախարարն ասել է տեղական լրատվամիջոցների հետ զրույցում՝ միաժամանակ նշելով, որ չի ցանկանում մեկնաբանել երկու երկրների հարաբերությունները։

«Բայց ընդհանուր առմամբ, կարող եմ նշել, որ 2024 թվականին մենք տեսանք Հայաստանին միակողմանի աջակցության փաստեր թե՛ Ամերիկայի Միացյալ Նահանգներից, թե՛ դեմոկրատական ​​վարչակազմից, թե՛ եվրոպական մի շարք մայրաքաղաքներից։ Եթե հիշում եք, անցյալ տարվա ապրիլի 5-ին հանդիպումներ են եղել ԱՄՆ պետքարտուղարի, Եվրոպական միության հանձնաժողովի նախագահի, Հայաստանի վարչապետի միջև։ Այնուամենայնիվ, դժվար էր դրան որևէ բացատրություն տալ։ Անընդունելի են կողմերի կողմնակալ մոտեցումները, որոնք փորձում են ներկայանալ որպես միջնորդ Հայաստան-Ադրբեջան հարաբերությունների կարգավորման գործընթացի բավականին ինտենսիվ փուլում»,-ասել է Բայրամովը։

Նա նշել է, թե տեսել են ԱՄՆ դեմոկրատական ​​վարչակազմի կողմից մի շարք «կողմնակալ քայլեր, երբ Ադրբեջանը վերականգնել է իր ինքնիշխանությունը, Ազատության աջակցության ակտի թիվ 907 ուղղումը չեղյալ համարելու հետագա քայլեր չեն ձեռնարկվել, և այդպիսով որոշակի առումով Ադրբեջանին պատժելու մտադրություն է եղել»։

«Հիմա 4 տարի ԱՄՆ-ում հանրապետականները կլինեն իշխանության։ Մենք կարծում ենք, որ ԱՄՆ-ում նոր նախագահի երդմնակալությունից հետո մենք կտեսնենք Ադրբեջանի նկատմամբ մոտեցումների տարբերություն, առնվազն փոխադարձ շահերի ու հարգանքի հիման վրա ձևավորված հարաբերություններ»,-ընդգծել է Ադրբեջանի ԱԳ  նախարարը։

Հիշեցնենք, որ օրերս էլ Բայրամովը, անդրադառնալով ԱՄՆ-ի հետ հարաբերություններին, հայտարարել էր, թե «ժամանակն է ամբողջությամբ դադարեցնել USAID-ի գործունեությունն Ադրբեջանում»։

Թարգմանությունը՝ Էմմա Չոբանյանի