10.08.2026 | 12:11
ԱԺ-ում Արամ Վարդևանյանի ընտրության հարցով քվեարկություն է // Ջերմաստիճանը մինչև 5 աստիճանով կնվազի․ ԼՈՒՐԵՐ
Բայրամովը հայտարարել է, որ «ժամանակն է ամբողջությամբ դադարեցնել USAID-ի գործունեությունն Ադրբեջանում»
Քաղաքականություն
16.01.2025 | 21:23
Ադրբեջանը 907-րդ փոփոխության պահպանմամբ «պատժվել» է ԱՄՆ-ի կողմից՝ 2023 թվականին իր ինքնիշխանությունը վերականգնելու համար։ Այս մասին հայտարարել է Ադրբեջանի ԱԳ նախարար Ջեյհուն Բայրամովը Բաքվում Վրաստանի ԱԳ նախարար Մակա Բոչորիշվիլիի հետ համատեղ մամուլի ասուլիսում։
Նա կրկին արդարացրել է 2023 թվականին Արցախում Բաքվի կողմից իրականացրած ռազմական ագրեսիան ու դրան հետևած էթնիկ զտումը։
«2023 թվականի սեպտեմբերին Ադրբեջանը վերականգնեց իր ինքնիշխանությունը՝ 23-ժամյա հակաահաբեկչական գործողություն իրականացնելով իր ինքնիշխան տարածքում։ Դրանից կարճ ժամանակ անց մենք ականատես եղանք ԱՄՆ-ի հարձակումներին, որոնք անհամատեղելի են միջազգային իրավունքի հետ։ Գործում էր պատժամիջոցների փաստաթուղթ, որը կոչվում էր Ազատության աջակցության 907-րդ ակտ, որն ընդունվել էր 1992 թվականին և երկար տարիներ կասեցված էր Ադրբեջանի դեմ։ Սակայն վերջին անգամ այդ կասեցումը տեղի չունեցավ, և 20 տարի անց Ադրբեջանը «պատժվեց» իր ինքնիշխանությունը վերականգնելու համար»,- ասել է Բայրամովը՝ անդրադառնալով Ադրբեջանում USAID-ի գործունեությանը։
Նա հավելել է, որ 2024 թվականի հուլիսի 1-ից ԱՄՆ Միջազգային զարգացման գործակալության գործունեությունը Ադրբեջանում դե յուրե անհնար է։
«Ժամանակն է դադարեցնել նրանց գործունեությունը, մենք բանակցությունների ընթացքում տեսանք, որ ԱՄՆ-ն անտեսում է Ադրբեջանի շահերը և փորձում է թելադրել իր սեփական շահերը։ Ադրբեջանում USAID-ի ներկայության և ներկայացուցչության կարիք չկա, արդեն եկել է նրանց գործունեության ամբողջական դադարեցման պահը»,- հայտարարել է Բայրամովը։
Թարգմանությունը՝ Էմմա Չոբանյանի
