11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Ադրբեջանի Մեջլիսի պատգամավորը Ֆրանսիային է մեղադրել COP29-ի ընթացում ադրբեջանցիների կողմից բողոքի ակցիաների անցկացման համար
Քաղաքականություն
19.11.2024 | 23:29
Ադրբեջանի Միլլի Մեջլիսի պատգամավոր Ջավանշիր Փաշազադեն Բաքվում ընթացող ՄԱԿ-ի կլիմայական համաժողովի ընթացքում ադրբեջանցիների կողմից անցկացված անհատական ակցիաների համար մեղադրել է Ֆրանսիային։ Նա ասել է, թե «Ադրբեջանում COP29-ի անցկացումը ևս մեկ անգամ հաստատել է երկրում խաղաղության, ժողովրդավարության և շրջակա միջավայրի պաշտպանության կարևորությունը, և չնայած արտաքին գործոններին՝ COP29-ը շատ հաջող է»։
«Այն երկրները, որոնք ուշադրություն չեն դարձնում Ադրբեջանին, չեն կարողանում նման հեղինակավոր միջոցառումներ անցկացնել, ցանկանում են ճնշում գործադրել մեր երկրի վրա նույնիսկ մինչև COP29-ը: Նրանք զբաղվում են մանր քաղաքականությամբ, ինչպես Ֆրանսիան, փորձում են իրականացնել երկիրն ապակայունացնելու թույլ ծրագրեր: Դրա վառ օրինակն այն է, որ ինչ-որ մեկն ակցիա է անում COP29-ի շրջանակում»,- հայտարարել է պատգամավորը։
Հիշեցնենք, որ նախօրեին Բաքվում COP29-ի շրջանակում Իսմայիլ Ջաֆարսոյը, որը տեխնիկական անձնակազմի աշխատակիցներից էր, անհատական բողոքի ակցիա էր անցկացրել՝ հայտարարելով, որ ոտնահարվում են ավելի քան 500 աշխատողների իրավունքները, որոնց աշխատավարձը չի վճարվում։ Նրան ոււժով դուրս էին տարել սրահից ու ձերբակալել։
Օրերս էլ Կենդանիների իրավունքների պաշտպան Քյամրան Մամեդլին էր ձերբակալվել կլիմայական կոնֆերանսի տարածքում բողոքի ցույց անցկացնելու համար։ Նա բողոքել էր թափառող շների վրա կրակելու դեմ։
Էմմա Չոբանյան
