ԵՄ դեսպանները համաձայնեցրել են ՌԴ-ի դեմ պատժամիջոցների նոր՝ ռեկորդային ցուցակը

ԵՄ դեսպանները համաձայնեցրել են ռուսական պատժամիջոցների նոր ցուցակը, որում ներառվել է միանգամից 826 կազմակերպություն և 743 ֆիզիկական անձ։ Սա ռեկորդային ցուցանիշ է պատժամիջոցների մեկանգամյա ընդլայնման առումով։ «Ազատություն» ռադիոկայանի և Current time-ի «Система» հետաքննական նախագծի հաղորդմամբ՝ այս բոլոր կազմակերպությունները կապված են Ռուսաստանի ռազմարդյունաբերական համալիրի հետ։

Լրագրողների տրամադրության տակ հայտնված փաստաթղթում նշվում է, որ ցուցակում ներառված կազմակերպությունները «մտնում են Ռուսաստանի կառավարության կողմից վերջերս կազմված՝ ռազմարդյունաբերական համալիրում ընդգրկված կազմակերպությունների ցանկի մեջ»։ Պատժամիջոցների ենթարկվող ֆիզիկական անձինք այդ կազմակերպությունների ղեկավարներն ու աշխատակիցներն են։ Կազմակերպությունների մի մասի նկատմամբ պատժամիջոցները սահմանվում են ոչ առաջին անգամ, այլ ընդլայնվում են։

Ցուցակում ներառվել են խոշոր արդյունաբերական ձեռնարկություններ, այդ թվում՝ «Զվյոզդոչկա» նավանորոգման գործարանը և «Ադմիրալտեյսկիե վերֆի»-ն, անօդաչու թռչող սարքերի և հրթիռների արտադրողներ, օրինակ՝ «КТ-Беспилотные системы»-ն, ինչպես նաև թեթև արդյունաբերության կազմակերպություններ։

Սահմանափակումների տակ, մասնավորապես, հայտնվել են Կիրովի արհեստական կաշվի կոմբինատը, Կուրգանի կարի ֆաբրիկան և Միավորված հրթիռատիեզերական կորպորացիան։

Համաձայնեցված ցուցակում մեկ կազմակերպություն և մեկ ֆիզիկական անձ ավելի պակաս են ներառվել, քան ի սկզբանե քննարկվող ցուցակում։ Ցուցակից հանվել են Սոլիկամսկի մագնեզիումի գործարանը և դրա տնօրեն Ռուսլան Դիմուխամեդովը։

«Система»-ի վերլուծության համաձայն՝ պատժամիջոցների նոր ցուցակում ներառված բոլոր կազմակերպությունները ընդգրկված են Ռուսաստանի արդյունաբերության և առևտրի նախարարության պաշտպանական ձեռնարկությունների փակ ցանկում։ Այն 2025 թվականին հրապարակել է «Դոսյե» հետազոտական կենտրոնը։

Միաժամանակ, ԵՄ ցուցակում հայտնվել է Ռուսաստանի արդյունաբերության և առևտրի նախարարության ռեեստրի միայն փոքր մասը, որը ներառում է ավելի քան 6 հազար կազմակերպություն։

Այն սկզբունքի մասին, որով ձեռնարկություններն ընտրվել են ԵՄ ցուցակի համար, կարող է վկայել փաստաթղթում առկա նշումը․ պատժամիջոցների տակ հայտնված կազմակերպություններից յուրաքանչյուրը իրավունք ունի ստանալու պետական սուբսիդիաներ՝ աշխատակիցների բնակարանի հետ կապված ծախսերը փոխհատուցելու համար։ Ռուսաստանի արդյունաբերության և առևտրի նախարարության 2026 թվականի ապրիլի 24-ի նամակով սահմանվում է, որ նման արտոնությունները տարածվում են ոչ թե ռազմարդյունաբերական համալիրի ամբողջ ռեեստրի, այլ միայն այն կազմակերպությունների վրա, որոնք իրավունք ունեն աշխատանքի հատուկ պայմաններ սահմանելու։ Այդ կազմակերպությունների ցանկը բաց հասանելիության մեջ չկա։

Բրյուսելում «Система»-ի աղբյուրի տվյալներով՝ պատժամիջոցների նոր փաթեթի ընդունման մասին պետք է հայտարարվի հաջորդ շաբաթ կայանալիք ԵՄ արտաքին գործերի նախարարների հանդիպման ժամանակ։

Թարգմանությունը՝ Էմմա Չոբանյանի