Եթե ոստիկանության գալուն սպասեին, ոչ մի բան, մեծ հավանականությամբ, տեղի չէր ունենա․ Փաշինյանը՝ Շաքիի դեպքի մասին․ ՏԵՍԱՆՅՈՒԹ

Ազգային ժողովում պատգամավորների հարցուպատասխանի ընթացքում քննարկում է ծավալվել Սյունիքի մարզի Շաքի գյուղում ադրբեջանցի զինծառայողի ներթափանցման և տեղի բնակչուհի Անի Ավետիսյանի հետ պատահարի շուրջ։

Ընդդիմադիր պատգամավոր Արեգա Հովսեփյանն իր հարցում պնդեց, որ ՀՀ քաղաքացին փաստացի մնացել է անպաշտպան զինված թշնամու դեմ։ Նա հիշեցրեց, որ Շաքի գյուղի բնակչուհի Անի Ավետիսյանը, պաշտպանելով իր երեխաներին, ինքնապաշտպանվել է և վիրավորվել ադրբեջանցի զինծառայողից։ Պատգամավորը մեղադրեց իշխանություններին թույլ և անինքնիշխան լինելու մեջ՝ նշելով, որ քաղաքացիները Երևանում թե մարզերում գտնվում են ոչ անվտանգ միջավայրում։

Վարչապետ Նիկոլ Փաշինյանը, արձագանքելով մեղադրանքներին, ընդգծեց, որ միջադեպը պետք չէ քաղաքականացնել կամ ռազմականացնել։ Նրա խոսքով՝ տեղի ունեցածը սահմանի ապօրինի հատման հետևանքով առաջացած կրիմինալ իրավիճակ է, որպիսիք պատահում են բոլոր երկրներում․ «Հայաստանի քաղաքացին ոչ թե պիտի զանգեր ոստիկանություն, այլ զանգած է եղել ոստիկանություն․․․ Երեխաները եկել են, տեսել են, որ տանը օտար մարդ կա, հետո զանգել են մայրիկին․․․ մայրիկը զանգել է ոստիկանություն։ Բայց մայրիկը ավելի շուտ է տեղ հասել»։

Փաշինյանը հավելեց․ «Եվ եթե ոստիկանության գալուն սպասեին, ոչ մի բան, բացարձակապես ոչ մի բան, մեծ հավանականությամբ, տեղի չէր ունենալ»։

Վարչապետը հայտարարեց, որ ընդդիմության տրամաբանությամբ՝ ցանկացած նման միջադեպի դեպքում պետք է հայտարարվեր ռազմական դրություն, իրականացվեր մասնակի կամ ամբողջական զորահավաք, և հրետանային ու օդային հարվածներ հասցվեին հակառակորդի դիրքերին։ Ըստ Փաշինյանի՝ նման մոտեցումները միայն ավելորդ էսկալացիայի և պատերազմական վտանգների են հանգեցնում։

Մանրամասները՝ տեսանյութում։

Եվգենյա Համբարձումյան