30.04.2026 | 21:27
Այսօրվա փաստաթղթի ստորագրումը նշանակալի քայլ է գյուղական զարգացման ամրապնդման ճանապարհին. Պապոյան
Իրանը պատրաստ չէ բանակցել ճնշման ներքո․ ՄԱԳԱՏԷ-ի ղեկավարը Թեհրանում հանդիպել է Իրանի ԱԳ նախարարի հետ
Քաղաքականություն
14.11.2024 | 16:18
Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսսին նախօրեին ժամանել է Թեհրան՝ հանդիպելու Իրանի պաշտոնյաների հետ և խորհրդակցելու ապագա համագործակցության վերաբերյալ։ Այսօր առավոտյան նա հանդիպել է Իրանի ԱԳ նախարար Աբբաս Արաղչիին, գրում է Mehr գործակալությունը։
Գրոսսիի հետ հանդիպման մասին Արաղչին X-ի իր միկրոբլոգում գրել է, որ կարևոր և պարզ բանակցություններ են ունեցել ՄԱԳԱՏԷ-ի ղեկավարի հետ։
«Որպես NPT-ի հավատարիմ անդամ՝ մենք շարունակում ենք մեր լիարժեք համագործակցությունը ՄԱԳԱՏԷ-ի հետ: Տարաձայնությունները կարող են լուծվել համագործակցության և երկխոսության միջոցով։ Մենք պայմանավորվել ենք շարունակել քաջությամբ և բարի կամքով»,- նշել է Իրանի ԱԳ նախարարը։
Իրանցի դիվանագետը նշել է, որ Թեհրանը երբեք չի լքել իր խաղաղ միջուկային ծրագրի հարցով բանակցությունների սեղանը։
Հիմա, ըստ նրա, գնդակը ԵՄ-ի դաշտում է։ Արաղչին ընդգծել է, որ Իրանը պատրաստ է բանակցել՝ ելնելով իր ազգային շահերից և անքակտելի իրավունքներից, բայց պատրաստ չէ բանակցել ճնշման և ահաբեկման ներքո։
Թարգմանությունը՝ Էմմա Չոբանյանի
