07.10.2026 | 21:38
Ովքեր են ղեկավարում Սյունիքի համայնքները․ քաղաքական անցյալ, բիզնես կապեր և քրեական վարույթներ
Տվերի ռազմամթերքի պահեստում առաջին պայթյունները սեյսմիկ սարքերը գրանցել են որպես 2,8 բալ ուժգնությամբ երկրաշարժ
Քաղաքականություն
18.09.2024 | 16:40
Ուկրաինական անօդաչու թռչող սարքերի նոր գրոհը Ռուսաստանի տարածքում, որը տեղի է ունեցել սեպտեմբերի 18-ի գիշերը և ընդգրկել է առնվազն հինգ շրջան, հանգեցրել է ռուսական Զինված ուժերի ամենամեծ ռազմական պահեստներից մեկի ոչնչացմանը, որտեղ պահվում էին հրթիռներ, այդ թվում՝ ամենավերջինները, գրում է The Moscow Times-ը։
Տվերի մարզի Տորոպեցում 2018 թվականին կառուցված զինանոցը, որտեղ տեղակայված է թիվ 54169 զորամասը, հարձակման է ենթարկվել տեղական ժամանակով 4։00-ի սահմաններում, որից հետո պայթյուններ են հնչել ավելի քան 10 հազար բնակչություն ունեցող քաղաքում։ Դրանք այնքան ուժգին են եղել, որ, ըստ տեղի բնակիչների, տների պատուհաններն ու դռները կոտրվել են։
Տարածաշրջանային կառավարությունը հայտնել է «ԱԹՍ-ի բեկորների անկման» և հակաօդային պաշտպանության համակարգերի շահագործման մասին, ինչպես նաև վստահեցրել, որ «իրավիճակը վերահսկելի է»։ Բայց ակնհայտ է, որ դա այդպես չէ, գրում են տելեգրամյան ալիքները։
«Պահեստներում պայթյուններն այնքան ուժգին են եղել, որ դրանք գրանցվել են երկրաշարժերի մոնիթորինգի համակարգերի կողմից»,- նշում է «Ռիբարը»:
Volcanodiscovery-ի տվյալներով՝ առաջին ցնցումների ուժգնությունը կազմել է 2,8 բալ, իսկ հաջորդներինը՝ ավելի քան 2 բալ։
NASA-ի արբանյակային մոնիթորինգի լուսանկարները ցույց են տալիս, որ ռուսական ռազմաբազան ամբողջությամբ այրվում է։
Թարգմանությունը՝ Տաթև Ֆռանգյանի
