23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Ադրբեջանը սկսել է Սլովենիային գազ մատակարարել
Քաղաքականություն
02.08.2024 | 15:09
Օգոստոսի 1-ից Ադրբեջանի պետական նավթային ընկերությունը (SOCAR) սկսել է գազի մատակարարումները Սլովենիա։ SOCAR-ը հայտարարել է, որ գազի մատակարարումն իրականացվում է բնական գազի շուկայում Սլովենիայի խոշորագույն ընկերության՝ Geoplin-ի հետ գազամատակարարման ոլորտում համագործակցության ընդլայնման վերաբերյալ փոխըմբռնման հուշագրի համաձայն, որը ստորագրվել է այս տարվա հուլիսի 17-ին, գրում են ադրբեջանական լրատվամիջոցները։
Նշվում է, որ SOCAR-ը և Geoplin-ը հավատարիմ են էներգետիկ ոլորտում երկարաժամկետ գործընկերության հետագա զարգացմանը:
Այսպիսով, Սլովենիան դարձել է 9-րդ երկիրը Թուրքիայից, Վրաստանից, Իտալիայից, Հունաստանից, Բուլղարիայից, Ռումինիայից, Հունգարիայից և Սերբիայից հետո, որն ադրբեջանական գազ է ստանում։
Հավելենք, որ Ադրբեջանի նախագահ Իլհամ Ալիևը Մեծ Բրիտանիայում Եվրոպական քաղաքական համայնքի շրջանակում «Էներգիա և հաղորդակցություն» թեմայով կլոր սեղանի ժամանակ հայտարարել էր, որ բանակցություններ են տարվում Սլովենիա ու Սլովակիա ադրբեջանական գազի մատակարարումների շուրջ։
«Հույս ունենք, որ առաջիկա մի քանի ամիսների ընթացքում մենք դուրս կգանք նաև սլովենական շուկա: Մենք պետք է արագացնենք բանակցությունները մեր նոր գործընկերների՝ Սլովենիայի և Սլովակիայի հետ, ինչպես նաև ավելացնենք մատակարարումներն առկա շուկաներ»,- ասել էր Ադրբեջանի նախագահը։
