10.06.2026 | 15:23
Պուտինի և Փաշինյանի հանդիպման վերաբերյալ դեռևս հստակ պայմանավորվածություններ չկան․ Պեսկով
Երկաթգծի վրա դիվերսիաներն իրականացրել են ծայրահեղ ձախերը․ Ֆրանսիայի ՆԳՆ
Քաղաքականություն
29.07.2024 | 15:20
Ֆրանսիայում ձերբակալվել է ծայրահեղ ձախակողմյան ակտիվիստ՝ Երկաթուղիների ազգային ընկերության երկաթուղային գծերում դիվերսիաներին մասնակցելու կասկածանքով, հայտնում է AFP-ն՝ վկայակոչելով իր աղբյուրին։
Ֆրանսիայի ներքին գործերի նախարար Ժերալդ Դարմանենը France 24 հեռուստաալիքի եթերում հայտնել է, որ քննիչները կարողացել են բացահայտել դիվերսիայի մի քանի պոտենցիալ մասնակիցների։ Նրա խոսքով՝ հարձակումները եղել են միտումնավոր, «շատ ճշգրիտ և նպատակային»։ Նախարարը պարզաբանել է, որ սա «ծայրահեղ ձախերի տիպիկ գործելաոճն է»։
Ոստիկանությունը դեռևս չգիտի՝ նրանք ինքնուրո՞ւյն են գործել, թե՞ ինչ-որ մեկի հանձնարարությամբ, հավելել է Դարմանենը։
Ձերբակալվածի ինքնությունը դեռևս հայտնի չէ։ Ըստ AFP-ի՝ նրա մեքենայում ոստիկանները հայտնաբերել են տեխնիկական սենյակներ մուտք գործելու բանալիներ, մետաղալարեր կտրող սարքեր և բանալիների ունիվերսալ հավաքածու։
Հուլիսի 26-ին՝ Օլիմպիական խաղերի բացման արարողությունից մի քանի ժամ առաջ, հրդեհներ էին բռնկվել Ֆրանսիայի ազգային երկաթուղիներ ընկերության երեք արագընթաց երկաթուղային գծերում։ Ընկերության ղեկավարությունը հայտնել է դիվերսիայի մասին:
