17.12.2025 | 11:45
Հայկ Սարգսյանի ճեպազրույցը. ՈՒՂԻՂ
Վերին Լարսի անցակետում կուտակումներ չկան․ ՌԴ-ում ՀՀ դեսպանության մաքսային կցորդ
22.07.2024 | 15:19
Վերին Լարսի անցակետում կուտակումներ չկան, այս մասին Factor.am-ին հայտնեց ՌԴ-ում ՀՀ դեսպանության մաքսային կցորդ Վահան Հակոբյանն՝ անդրադառնալով լուրերին, թե ռուս-վրացական սահմանին կրկին հերթեր են, և սպասող բեռնատարների թիվը հասել է 2500-ի։
ՌԴ-ում ՀՀ դեսպանության մաքսային կցորդը բացատրեց, որ այդ թիվը Վրաստան մուտքի համար օնլայն գրանցված բեռնատարների քանակն է։ «Շատ բեռնատարներ կարող են հերթագրվել, բայց ավելի ուշ ճանապարհ դուրս գալ, ինչը նշանակում է, որ թիվը ճշգրիտ չէ և չի արտացոլում այսօրվա պատկերը»,-ասաց Հակոբյանը։
Նրա փոխանցմամբ՝ Հայաստանից 500 բեռնատար է մեկնել Վերին Լարսի ուղղությամբ, մի մասը գտնվում է Վրաստանի տարածքում, մյուս մասն էլ մաքսազերծում է անցնում անցակետում։
«Ամեն ուղղությամբ մոտ 500 մեքենա ունենք ճանապարհներին, որպես այդպիսին կուտակումներ չկան, ամենօրյա հոսքն է, որը միշտ ճանապարհներին լինում է։ Դա կուտակում չէ, նորմալ, բնականոն ընթացք է։ Այս իրավիճակը սեզոնին համահունչ է։ Երբ տուրիստական սեզոնը սկսվեց, մեծ կուտակումներ եղան, հիմա անցակետում նման կուտակումներ չկան, իրավիճակը կարգավորվել է»,- նշեց ՌԴ-ում ՀՀ դեսպանության մաքսային կցորդը։
«Ինտերֆաքս»- տեղեկացմամբ՝ Վրաստան մուտքի համար օնլայն գրանցված է 2 465 բեռնատար։
Ավելի վաղ Հյուսիսային Օսիայի ղեկավարն ասել էր, որ հանրապետությունում բարձր պատրաստվածության ռեժիմ է սահմանվել սահմանին տարանցիկ մեքենաների կուտակման պատճառով։
