Եվրախորհրդարանի ընտրություններ. Ֆրանսիայում հաղթում են ծայրահեղ աջերը

Ֆրանսիայի նախագահ Էմանուել Մակրոնը հայտարարել է երկրի խորհրդարանը ցրելու մասին այն բանից հետո, երբ exit poll-ի արդյունքները ցույց են տվել, որ Մարին Լը Պենի ծայրահեղ աջ կուսակցության հստակ հաղթանակ է տանում Եվրախորհրդարանի ընտրություններում, գրում է BBC-ի ռուսական ծառայությունը։

Եվրախորհրդարանի ընտրություններն այս շաբաթվա ընթացքում տեղի են ունեցել տարբեր օրերի։ Exit poll-ը և ձայների հաշվարկի առաջին արդյունքները վկայում են ծայրահեղ աջ կուսակցությունների հաջողության մասին շատ երկրներում, այդ թվում՝ Ֆրանսիայում և Գերմանիայում:

Ֆրանսիայում exit poll-ը ցույց է տվել, որ Մարին Լը Պենի «Ազգային միասնությունն» առաջ է անցել նախագահ Էմանուել Մակրոնի աջ կենտրոնամետ «Վերածնունդ» կուսակցությունից: Ընտրությունների արդյունքներով Եվրոպական ժողովրդական կուսակցությունը (ԵԺԿ) ստանում է ավելի քան 190 տեղ Եվրախորհրդարանում։

Ազգային ժողովը ցրելու և հունիսի 30-ին ու հուլիսի 7-ին նոր ընտրություններ նշանակելու՝ Մակրոնի որոշումը հաջորդել է Լը Պենի կուսակցության ընտրական ցուցակը գլխավորող Ջորդան Բարդելլայի կոչից անմիջապես հետո։

Գերմանիայում կառավարական կոալիցիայի երեք կուսակցությունները զգալիորեն զիջում են աջ կենտրոնամետ «Քրիստոնեա-դեմոկրատական միությանը», որն ունի 30%, ծայրահեղ աջ «Այլընտրանք Գերմանիայի համար» կուսակցությունը, ըստ կանխատեսումների, կունենա 16 տոկոս, ինչը 2019 թ ընտրությունների համեմատ՝ ավելին է հինգ տոկոսային կետով:

Օլաֆ Շոլցի իշխող սոցիալ-դեմոկրատները հավաքում են ձայների ընդամենը 14%, կանաչները՝ 12%, Ազատ դեմոկրատները՝ ընդամենը 5%։ Բոլորն էլ ձայներ են կորցրել՝ Եվրախորհրդարանի վերջին ընտրությունների հետ համեմատ։

Կանխատեսվում է, որ Ավստրիայում ծայրահեղ աջ «Ազատություն» կուսակցությունը կհայտնվի առաջին հորիզոնականում ձայների 27%-ով:

Հոլանդիայում, սակայն, անցած աշնանը կայացած խորհրդարանական ընտրություններում վստահ հաղթանակած Գերտ Վիլդերսի «Ազատություն» կուսակցությունը, ըստ exit poll-ի, այս անգամ երկրորդ տեղում է։ Նրանից նկատելիորեն առաջ է անցել սոցիալիստների և կանաչների դաշինքը՝ Եվրահանձնաժողովի նախկին փոխնախագահ Ֆրանս Թիմերմանսի գլխավորությամբ։