Մարդուն պաշտոն ես առաջարկում բարձր աշխատավարձով, չի համաձայնում, ասում է, գամ՝ ինձ վիրավորե՞ն․ ՔՊ-ական պատգամավոր. ՏԵՍԱՆՅՈՒԹ

Հասարակական մի քանի կազմակերպություն հայտարարություն է տարածել և քաղաքական մեծամասնությանն առաջարկում է Էթիկայի հանձնաժողով ձևավորել և քննարկել Ազգային ժողովի նախագահ Ալեն Սիմոնյանի և քաղաքացու հետ կապված միջադեպը։

Հիշեցնենք` ապրիլի 2-ին հայտնի դարձավ, որ Կասկադում մի երիտասարդ Ալեն Սիմոնյանին դավաճան է անվանել:
Քաղաքացի Կարեն Մկրտչյանը ֆեյսբուքյան էջում հայտնել էր, որ Ազգային ժողովի նախագահ Ալեն Սիմոնյանը հրահանգել է իր թիկնազորի աշխատակիցներին բռնել իրեն և թքել է իր վրա այն բանից հետո, երբ ինքն Ալեն Սիմոնյանին դավաճան է անվանել։

ԱԺ նախագահը չի հերքել, որ նման միջադեպ է եղել, բայց չի հստակեցրել, թե ինչպես է արձագանքել իրեն դավաճան անվանած երիտասարդին։ ԱԺ նախագահը նշել է, որ լկտիությունն անպատասխան չի մնալու․ ՀՀ օրինական իշխանությանը վիրավորելուն լինելու է օրինական պատասխան։

Այս թեմայի շուրջ Factor.am-ի հետ զրույցում Քաղաքացիական պայմանագիր» խմբակցության պատգամավոր Գևորգ Պապոյանը նշեց․  «Խոսքի ազատության համար պատրաստ եմ պայքարել, բայց անհրաժեշտ է կրթական աշխատանք տանել հանրության հետ, որպեսզի հասկանան, որ խոսքի ազատությունը դիմացինին վիրավորելը, նսեմացնելը չէ, լկտիությունն ու լպիրշությունը չէ։

«Մենք չպետք է սադրանքների գնանք, բայց իշխանական պատգամավորների դեմ կազմակերպված պրոցես է գնում այն ուժերի կողմից, որոնք հետո շահարկում են միջադեպը։

Մարդուն պաշտոն ես առաջարկում բարձր աշխատավարձով, չի համաձայնում, ասում է, գամ՝ ի՞նչ անեմ, գամ, որ ինձ վիրավորե՞ն։ Սա խնդիր է, պետության հիմքերի հետ կապված խնդիր է։ Այն, ինչ այդ շրջանակներն անում են, մեզ չի հարվածում, պետությանն է հարվածում»։

Մանրամասները՝ տեսանյութում։