Հերի՛ք եղավ, կյանքներս կերան, թող գնան «սև ցուցակ», խզե՛լ պայմանագիրը․ Ավինյան․ ՏԵՍԱՆՅՈՒԹ

Երևանի Ազատության պողոտայում ոռոգման ցանցի կառուցման ընթացքում տեղադրվել են անորակ ու թերի խողովակներ, ինչի հետևանքով պարբերաբար վթարներ ու արտահոսքեր են տեղի ունենում: Քաղաքապետ Տիգրան Ավինյանը հանձնարարեց անհապաղ խզել պայմանագիրը տվյալ շինարարական ընկերության հետ և նրան ուղարկել «սև ցուցակ»:

Երևանի քաղաքապետարանի գործակարգավարական նիստի ընթացքում քաղաքապետի խորհրդական Կամո Արեյանը զեկուցեց, որ Ազատության պողոտայում աշխատող կապալառուն տեղադրել է տեղական արտադրության խոտանված խողովակներ, որոնք ճնշմանը չեն դիմանում։

«Խողովակը մոնտաժումից հետո անընդհատ ջրի արտահոսք է տալիս: Իմ այցից հետո առաջարկել եմ կոմունալ վարչությանը՝ գնալ իրավական ճանապարհով, խզել պայմանագիրը, ուղարկել «սև ցուցակ» և խողովակները տալ պետական փորձաքննության: Տեղադրված 500 մետրը հիմա ստիպված փոխում են ավելի հաստ խողովակով, բայց դա էլ մխիթարանք չէ»,- նշեց Արեյանը:

Տիգրան Ավինյանը վրդովմունք հայտնեց կապալառուների անպատասխանատու գործելաոճի առնչությամբ՝ հանձնարարելով առանց հապաղելու պատժել ընկերությանը։

«Այո՛, պետք է խզել, ու պետք է խզել շտա՛պ: Ու այո՛, թող գնան «սև ցուցակ»: Ու այո՛, հերի՛ք եղավ, կյանքներս կերան: Պռոշյան-Պարոնյանն ամբողջ տարին տենց քանդած թողեցին, Ազատությունն էլ ամիսը մի անգամ մի հատ տենց «ֆանտան» էր անում, որովհետև որոշել էին գնալ էժան տարբերակով: Խզե՛լ պայմանագիրը: Պիտի պատժվե՛ն այդ մարդիկ: Այդ անընդհատ մոտեցումը, թե «դե մի բան անենք, որ հասցնենք», ինձ չի հետաքրքրում: Խզե՛ք»,- շեշտեց Ավինյանը:

Քաղաքապետը հանձնարարեց պայմանագրի խզումից հետո հրատապության կարգով ներգրավել նոր և բարեխիղճ կազմակերպություն, որը որակով ավարտին կհասցնի Ազատության պողոտայի ոռոգման ցանցի անավարտ հատվածը:

Մանրամասները՝ տեսանյութում։

Անի Թամրազյան