23.11.2024 | 14:46
Հայտարարվել է Հակակոռուպցիոն կոմիտեի նախագահի թեկնածուների ընտրության խորհրդի ներկայացուցիչների ներգրավման մրցույթ
Գյումրի մտնող նեղ ճանապարհը կլայնացնեն և կդարձնեն երկկողմանի
Տնտեսություն
07.02.2023 | 19:46
Կառավարությունը մտադիր է Հյուսիս-հարավ ճանապարհի կառուցմանը զուգընթաց հանրապետության երկրորդ քաղաք մտնող նեղ ճանապարհը լայնացնել, դարձնել երկկողմանի։ Այս մասին Շիրակի մարզային իշխանություններին տեղեկացրել էր ՀՀ տարածքային կառավարման և ենթակառուցվածքների նախարար Գնել Սանոսյանը՝ հայտարարելով․ «Հյուսիս-հարավ ճանապարհի մինչև Գյումրի հասնելը կա շրջանցիկ հատված և կա Բավրա հատված։ Այն հատվածից սկսած, երբ որ մենք պիտի շարունակենք դեպի Գյումրի, գոյություն ունի սովորական, նեղ ճանապարհ։ Մենք որոշել ենք, որ պետք է փոխենք այդ ճանապարհի կարգը և ավելի բարձրակարգ ճանապարհ կառուցենք՝ հաշվի առնելով, որ մեր երկրորդ քաղաքն է և չլինի այնպես, որ հենց Հյուսիս-հարավն ավարտվի, ամբողջովին այլ որակի կամ այլ ստանդարտի ճանապարհով մուտք գործենք Գյումրի։
Դրա համար կփորձենք, ինչքան հնարավորությունը թույլ կտա բարձրակարգ երկկողմանի ճանապարհով Հյուսիս-հարավը շարունակել դեպի Գյումրի»։
Շիրակի մարզպետարանի քաղաքաշինության վարչության պետ Խաչատուր Խնձրցյանն էլ մեզ հետ զրույցում պարզաբանեց, որ նախարարի խոսքը Գյումրի մտնող հատվածի մասին է, որը նախկինում եղել է Հյուսիս-հարավ ճանապարհի բաղկացուցիչ մաս, այնուհետ նախագիծը փոխվել է և դուրս է մնացել Հյուսիս-հարավ ճանապարհից։
Ըստ Խաչատուր Խնրձցյանի՝ այն միջպետական ճանապարհից դուրս եկած հատված է, որը Արևիկի խաչմերուկից գալիս-միանում Ազատանի կամուրջին։ Այն մնացել է միաթև, Շիրակի մարզպետարանից առաջարկել են դարձնել երկթև, կառավարության հետ համաձայնություն են ձեռք բերել։
Շիրակի մարզպետարանի պաշտոնյան ասաց․ «Այն նույն Հյուսիս-հարավի լայնքով պիտի գա, հասնի մինչև Գյումրի։ Աննպատակահամար է Գյումրի մտնող ճանապարհը լինի միաթև և նեղ։ Մայրուղուց գալիս ես ու նեղ ճանապարհով ես անցնում, հարցը քննարկվել է, համաձայնություն ձեռք բերվել է։
Նեղ ճանապարհի մասով մրցույթը եղել է, պարզապես ճանապարհը պիտի լայնացվի, լայնացված հատվածի համար դեռ նախագիծ չկա, որ մրցույթ լինի։ Եթե լայնացրեցին, շինարարությունը կսկսվի գարնանը, կտևի մեկ տարի, խոսքը 4,9 կիլոմետր հատվածի մասին է»։
Արմիկ Մովսիսյան
