Վաղվանից ուժի մեջ կմտնեն Հայաստանի համար ԵՄ առևտրային արտոնությունները

Հայաստանի համար Եվրամիության ժամանակավոր առևտրային արտոնություններն ուժի մեջ կմտնեն հոկտեմբերի 10-ին և կգործեն երկու տարի՝ աջակցելու հայ արտադրողներին ու արտահանողներին Ռուսաստանի սահմանած առևտրային սահմանափակումներից հետո։ Այս մասին Բրյուսելից հայտնում է Factor TV-ի թղթակիցը։ Փաստաաթուղթն այսօր հրապարակվել ԵՄ պաշտոնական տեղեկագրում։

Միջոցառումները ժամանակավորապես կազատականացնեն Հայաստանից ԵՄ արտահանման գրեթե 80 տոկոսը։ Դրանք կընդգրկեն Ռուսաստանի սահմանափակումներից տուժած թարմ մրգերի, բանջարեղենի և ծաղիկների՝ դեպի ԵՄ արտահանման գրեթե ամբողջ ծավալը, ինչպես նաև ըմպելիքների ու թունդ ալկոհոլային խմիչքների արտահանման ավելի քան 91 տոկոսը։

Ըստ Եվրահանձնաժողովի՝ արտոնությունները նպատակ ունեն մեղմելու հայ արտադրողների ու արտահանողների դժվարությունները և ամրապնդելու Հայաստանի տնտեսության դիմակայունությունը՝ հեշտացնելով մուտքը ԵՄ շուկա։

Արտոնությունների կիրառումը պայմանավորված կլինի որոշակի պահանջների կատարմամբ։ Նախատեսված են նաև պաշտպանական միջոցներ՝ ԵՄ արտադրողներին ներմուծման հնարավոր բացասական ազդեցությունից պաշտպանելու համար։

Առևտրային արտոնությունները Հայաստանի աջակցության ավելի լայն փաթեթի մաս են, որի մասին հայտարարել է Եվրահանձնաժողովի նախագահ Ուրսուլա ֆոն դեր Լայենը։

Եվրահանձնաժողովի տվյալներով՝ ԵՄ-ն 2025 թվականին Հայաստանի երրորդ խոշոր առևտրային գործընկերն էր՝ երկրի ընդհանուր առևտրում 11,3 տոկոս մասնաբաժնով։ Նույն տարում ԵՄ-ին բաժին էր ընկնում Հայաստանի արտահանման 7,9 տոկոսը։ ԵՄ-ն նաև Հայաստան ներմուծման երրորդ խոշոր աղբյուրն է՝ Հայաստանի ընդհանուր ներմուծման մեջ 13,5 տոկոս մասնաբաժնով։

ԵՄ-ի և Հայաստանի միջև ծառայությունների առևտուրը 2024 թվականին, 2023-ի համեմատ, աճել է 20 տոկոսով։ 2024 թվականին այդ առևտրի հաշվեկշիռը դրական է եղել ԵՄ-ի համար։

Կարինե Ասատրյան

Բրյուսել