Բաքվի հերթական ստահոդ հայտարարությունն ու արձագանքը Հայաստանի ԱԳՆ-ին

Ադրբեջան ԱԳՆ-ն, չդավաճանելով սեփական ավանդույթներին, հերթական ստահոդ ու կեղծ հայտարարությունն է տարածել՝ արձագանքելով Հայաստանի ԱԳՆ հայատարարությանը։

«Մենք կտրականապես մերժում ենք Հայաստանի ԱԳՆ-ի 2022թ․ դեկտեմբերի 13-ի անհիմն հայտարարությունը, որում ադրբեջանական կողմը մեղադրվում է Շուշի-Լաչին ճանապարհին ստեղծված իրավիճակի համար և խեղաթյուրում եռակողմ պայմանագրերով ստանձնած պարտավորությունները»,- ասվում է Բաքվի ԱԳՆ հայտարարության մեջ։

Ադրբեջանը, որն արդեն մի քանի օր է՝ փակել է Լաչինի միջանցքն ու հումանիտար ճգնաժամ ստեղծել Արցախում, Հայաստանի ԱԳՆ հայտարարությունը որակել է «կեղծավորություն»՝ նշելով, թե Երևանը, իբր, չի կատարում 2020 թվականի նոյեմբերի 9-ի եռակողմ հայտարարության դրույթները։

«Ինչ վերաբերում է պնդումներին, թե Լաչինի ճանապարհը փակվել է, և որ տարածքում ապրող հայ բնակիչները կանգնած են հումանիտար ճգնաժամի վտանգի առաջ, նշում ենք, որ Լաչինի ճանապարհը փակել են ոչ թե ադրբեջանցի ցուցարարները, այլ Ռուսաստանի Դաշնության խաղաղապահ զորախումբը։ Ադրբեջանական կողմը պատրաստ է բավարարել տեղի բոլոր բնակիչների հումանիտար կարիքները, և Հայաստանի պնդումները որևէ հիմք չունեն»,- ասվում է Բաքվի հայտարարության մեջ։

Ադրբեջանը նշում է, որ Հայաստանը, իբր, «պետք է վերջ դնի Ադրբեջանի ինքնիշխանության և տարածքային ամբողջականության դեմ ուղղված հայտարարություններին և գործողություններին»։

Բաքուն շարունակում է պնդել, որ Արցախի բնակիչներն «Ադրբեջանի քաղաքացիներ են», և հայերի իրավունքների ու անվտանգության ապահովման միջազգային մեխանիզմ ստեղծելու կոչերի առնչությամբ նշում, որ «Ղարաբաղի տարածաշրջանում բնակվող հայ ժողովրդի իրավունքների և անվտանգության հարցն Ադրբեջանի ներքին գործն է»։

Էմմա Չոբանյան