Ուկրաինան հայտարարել է ՌԴ-ին օգնող իրանցի հրահանգիչներին ոչնչացնելու մասին

Ուկրաինայի իշխանությունները պնդում են, որ Իրանից ժամանած հրահանգիչները, որոնք գտնվել են Ռուսաստանին բռնակցված տարածքներում, սպանվել են ուկրաինացի զինվորականների կողմից։ Այս մասին բրիտանական The Guardian-ին տված հարցազրույցում ասել է Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը։

Ավելի վաղ Կիևում պնդում էին, որ իրանցի մասնագետների մի փոքր խումբ գտնվում է Ղրիմում և վարժեցնում է ռուս զինվորականներին իրանական արտադրության Shahed-136 անօդաչու թռչող սարքերը կառավարելու համար, որոնք Ռուսաստանն օգտագործում է Ուկրաինայի թիրախներին հարվածելու համար: Ղրիմում իրանցի խորհրդականների ներկայության մասին հայտնել են նաև ԱՄՆ վարչակազմի ներկայացուցիչները։

Իրանն ու Ռուսաստանը հերքել են ինչպես անօդաչու թռչող սարքերի մատակարարումը, այնպես էլ իրանցի հրահանգիչների առկայությունը։ Նոյեմբերի սկզբին Իրանի ԱԳ նախարարը հայտնել էր, որ երկիրը Ռուսաստանին անօդաչու սարքեր է մատակարարել, սակայն մինչ պատերազմի սկսվելը։

«Դուք չպետք է լինեք այնտեղ, որտեղ չպետք է լինեք: Նրանք մեր տարածքում էին։ Մենք նրանց այստեղ չենք հրավիրել, և եթե նրանք համագործակցում են ահաբեկիչների հետ և մասնակցում են մեր ազգի ոչնչացմանը, պետք է սպանենք նրանց»,- ասել է Դանիլովը։

Նա նաև ընդգծել է, որ իրանական ցանկացած ռազմական ներկայություն Ռուսաստանի կողմից օկուպացված տարածքներում Ուկրաինայի կողմից կդիտարկվի որպես օրինական թիրախ։

Դանիլովը չի հստակեցրել, թե երբ և որտեղ են սպանվել, իր պնդմամբ, իրանցի հրահանգիչները և քանի անձի մասին է խոսքը։ Հոկտեմբերին իսրայելական KAN ռադիոկայանը հայտնել էր Ուկրաինայի պատերազմում 10 իրանցի խորհրդականների մահվան մասին։ Աղբյուրի փոխանցմամբ՝ դա տեղի է ունեցել Ղրիմում և Խերսոնի շրջանում։

Տաթև Ֆռանգյան