08.06.2026 | 06:12
1067 ընտրատեղամասերում քվեարկության նախնական արդյունքները․ ԿԸՀ
Էրդողանի դեմ համախմբված Թուրքիայի ընդդիմությունը պայքարում է ներքին տարաձայնությունների դեմ․ Financial Times
Քաղաքականություն
23.09.2022 | 23:30
Թուրքիայի ընդդիմադիր կուսակցությունների միջև տարաձայնությունները, որոնք փորձում են հաջորդ ընտրություններում հեռացնել գործող նախագահ Ռեջեփ Թայիփ Էրդողանին, խանգարում են նրանց հավաքվել մի բաժակ թեյի շուրջ։ Այս մասին գրում է Financial Times-ը։
Նշվում է, որ երկրի ընդդիմադիր կուսակցությունների բազմազանությունը խոչընդոտում է Էրդողանի 20-ամյա կառավարմանը վերջ տալու և խորհրդարանական համակարգին վերադառնալու ծրագրերին։ Ընդգծվում է աջ ազգայնական İYİ («Լավ») կուսակցության և քրդամետ Ժողովուրդների դեմոկրատական կուսակցության միջև վերջին «բախումը»։
İYİ-ի առաջնորդ Մերալ Աքշեներն այս ամսվա սկզբին հայտնվեց գլխագրերում, երբ նշեց, որ ինքը «չի նստի ոչ մի սեղանի շուրջ, որտեղ HDP-ն կլինի»՝ ի պատասխան գլխավոր ընդդիմադիր Ժողովրդահանրապետական կուսակցության (CHP) պատգամավոր Գյուրսել Թեքինի առաջարկին, որ HDP-ի թեկնածուն կարող է առաջադրվել նախարարական պաշտոնում, եթե հաջորդ տարի նշանակված ընտրություններում հաղթի ընդդիմությունը։
«HDP-ն չի կարող նստել որևէ սեղանի շուրջ, որտեղ մենք նստած ենք»,- ասել էր Աքշեները, ինչին ի պատասխան՝ HDP-ն ասել է, որ քրդամետ կուսակցության անդամները նույնիսկ «նույն թեյարանում թեյ չեն խմելու»։
Լրատվամիջոցը նշում է, որ Էրդողանից հետո կառավարության կազմի շուրջ տարաձայնությունների պատճառով ծագած բանավեճն ավելի խորը տարաձայնություններ է առաջացրել, և լուծված չէ հարցը, թե ո՞վ է լինելու Էրդողանի դեմ նախագահական մրցապայքարում միասնական թեկնածուն։
«Կարծում եմ, որ İYİ-ն օգտագործեց դա որպես պատրվակ՝ անուղղակիորեն դիմակայելու CHP-ին, ինչը նրանք որոշ ժամանակ ցանկանում էին անել։ Արդեն ներկոալիցիոն խզումներ էին հասունանում»,- ասել է Ստամբուլի Սաբանջը համալսարանի քաղաքագիտության դոցենտ Բերք Էսեն։
Ըստ նրա՝ կուսակցությունների միջև վեճի հիմնական հարցը միացյալ նախագահի թեկնածուն է։ Քեմալ Քըլըչդարօղլուն հավանական թեկնածու է համարվում, սակայն Աքշեները, որն իրեն դուրս է հանել մրցապայքարից, կողմ է CHP-ից Անկարայի քաղաքապետ Մանսուր Յավաշի թեկնածությանը։
Մեկ այլ խնդիր էլ İYİ-ի առարկությունն է Քըլըչդարօղլուի նախաձեռնությունների դեմ՝ ուղղված HDP-ին, որը վեց կուսակցությունների պաշտոնական ընդդիմադիր դաշինքի մաս չէ, բայց որի ընտրողներն առանցքային դեր կունենան ընտրություններում․ քրդերը կազմում են Թուրքիայի բնակչության 15-20 տոկոսը։
Լրատվամիջոցը նշում է, որ 2023 թվականի հունիսին ընդառաջ դաշինքի առջև ծառացած մարտահրավերները, որոնք ներառում են քրդերի և թուրքերի, աշխարհիկի և պահպանողականների, ձախերի և աջերի, աճում են:
Էմմա Չոբանյան
