16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Factor.am-ի ահազանգի շնորհիվ Պուշկին-Եկմալյան խաչմերուկում ապօրինի ծառահատում իրականացնողները ձերբակալվել են․ ՏԵՍԱՆՅՈՒԹ
Հասարակություն
06.09.2022 | 17:51
Factor.am-ը երեկ ահազանգել էր, որ Երևանի Պուշկին-Եկմալյան փողոցների խաչմերուկում՝ Պուշկին 49 շենքի դիմաց գտնվող ծառը կտրել են։ Ոստիկանությունը ժամեր առաջ հաղորդագրություն էր տարածել, ըստ որի՝ ապօրինի ծառահատողները հայտնաբերվել են։
Ոստիկանության տարածած առավել հանգամանալից հաղորդագրությունից ու պատրաստած տեսանյութից տեղեկանում ենք, որ ծառն ապօրինի հատած 30 և 45-ամյա տղամարդիկ ձերբակալվել են։
«Սեպտեմբերի 5-ին սոցցանցում և լրատվական կայքերում տեսանյութ տարածվեց, որտեղ երևացող անձինք մայրաքաղաքում ծառ էին կտրում․ հայտնում են ՀՀ ոստիկանությունից։
Ժամը 22.25-ին այս դեպքով ոստիկանությունում ահազանգ ստացվեց։ Հայտնում էին, որ մայրաքաղաքի Պուշկին-Եկմալյան փողոցների խաչմերուկում կենսունակ ծառ են ապօրինի հատել և «Օպել» մեքենայով տեղափոխել։
Ոստիկանության Կենտրոնական բաժնի ծառայողների միջոցառումներով պարզվեց, որ ծառը հատել են Երևանի բնակիչ, 30 և 45 տարեկան երկու տղամարդիկ։
Սեպտեմբերի 6-ին մայրաքաղաքի Արամի փողոցում ոստիկանները ապօրինի ծառահատում կատարելու կասկածանքով ձերբակալեցին 45-ամյա տղամարդուն և տեղափոխեցին ոստիկանության Կենտրոնական բաժին, իսկ 30-ամյա տղամարդն ինքնակամ ներակայացավ ոստիկանություն։
Նրանք ներկայացվել են քննչական ստորաբաժանում։
Կատարվում է նախաքննություն»,- ասված է հաղորդագրությունում։
Հիշեցնենք, որ ահազանգը հնչեցրել էր հարակից շենքի բնակիչը։ Նա տեսագրել էր, թե ինչպես են անհայտ անձինք մի քանի րոպեում կտրում մեծ ծառն ու տանում։ Բնակիչը նաև արձանագրել էր ծառը կտրողներին և նրանց ավտոմեքենայի համարանիշը։
